Shillong, Jylliew, 06: U nongïalam ka liang pyrshah bad u Myntri Rangbah barim ka jylla u Mukul Sangma u la dawa ba dei ban pynlong biang ïa ka written examination na ka bynta ki kam ha ki kyrdan bapher bapher hapoh ka tnat pulit hadien ba la mih ka jingkynnoh ba ka la don ka jingpulom jong ka central recruitment board (CRB) ban kohnguh ïa ki kyndon na ka bynta ban pynthikna ïa ka jingshisha ha baroh kawei ka kam thungkam thungjam.
“Ngan sa thoh sha u chairman ka CRB Meghalaya Police ban pynthikna ba ka written examination na ka bynta kane ka jingthungkam ha ki kyrdan bapher bapher ba dei ban pynlong biang,” ong u Sangma sha ki lad pathai khubor.
Kane ka jingdawa jong u ka la wan hadien ba ka CRB ha ka 3 tarik mynta u bnai ka la pynmih ïa ka kyrwoh khubor ba kyrpad ïa ki kyrtong ban ai ïa ki application, ki jingujor, ki jingkyrpad bad kiwei kiwei haba ïadei bad ka written test kaba dang shu dep ha shwa ka 6 tarik mynta u bnai, kaba katkum ka jingong u Mukul ka long mar khongpong bad ka jingpynbna kaba 6 tarik u Lber, 2024.
“Mano ba la khot ïa kane ka application? Hato ka don ka kyndon na ka bynta ki kyrtong ban aiti ïa kino kino ki jingkyrpad haba ïadei bad kane ka jingbthah? Hato ka recruitment policy ka pynbiang ïa kane?” buh jingkylli u Sangma.
U la ong, “Kane baroh ka jingleh da ka CRB ka Meghalaya police ka la pulom ban ai ka jingshaniah ban wanrah ïa ka hok ha kaba ïadei bad kane ka recruitment process,” u la ong da kaba bynrap, “Kane ka rukom treikam dei ban pynbna kum kaba ym treikam bad ïa ki written exam dei ban pynlong biang da kaba thymmai.”
U Myntri Rangbah barim u la kynnoh ba ka sorkar jylla ka la don bynta ha ka kam ban shah shilliang ha baroh kawei ka kam thungkam pulit bad kane ka la mih ruh ha ki jingkren ha ki social media.
 | ReplyForwardAdd reaction |
