Shillong, Naitung 22: U MLA ka VPP na North Shillong Constituency Bah Adelbert Nongrum ha ka sngi Baar u la pynpaw ka jingkyrmen ba ka sorkar MDA kan pynurlong ïa ki jingkular ban pynkynriah noh ïa ki 342 tylli ki longïing kiba sah ha Harijan Colony, Them Ïew Mawlong.
U Bah Nongrum u la pynpaw ka jingshaniah ba ka Sorkar kaba kam ba ka dei jong ki paidbah kan shim ki sienjam kiba kongsan ban pynbeit noh ïa kane ka kam ha shwa ban kut ka samoi treikam jong ka.
Haba batai ba ka jinglong jingman ka jingim jong ki briew kiba sah ha Harijan colony ka long ka bym shngaiñ, u Bah Nongrum u la ïathuh ba kane ka jaka ka long kaba don ka jingma, khamtam lada wan jia ka jingkhih u jumai ne kiwei pat ki jingjia shah lynshop ha kiwei ki bor mariang.
U la ong ba kane ka jaka sah ka long kum ka “Slum” bad kyntu ïa ka Sorkar Jylla ba kan shimkhia ïa kane ka kam bad ban pynsted pynkynriah ïa kine ki Harijan.
“Nga lah ban ong ba kane ka dei ka slum bad ka sorkar ka dei ban shim khia kloi bad kam dei satia ban pynslem ban pynkynriah ïa kine ki longïing na kane ka jaka,” bynrap u Bah Nongrum.
Haba bynrap ïa kane ka kam ban pynkynriah, u Bah Nongrum u la pynpaw ïa ka jingdonkam ban plie noh ïa ka surok ka ban lam sha Them Ïew Mawlong, kaba la khang ha kaba kane ka la long ka daw jong ka jingjia ka dheng kali.
U la banjur ba ka sorkar kadei ban pyrkhat haba pynbeit ruh ïa ki jingtei ha kane ka jaka khnang ban pynduna na ki jingjynjar jong kiba sah ha kane ka jaka.
Kum u MLA ka thaiñ, u Bah Nongrum u la kular ban bteng ban ïakren ïa kane ka kam, da kaba ong ruh ba kane kam dei tang ka kam hapoh ka constituency hynrei ruh ka dei na ka bynta ka bha ka miat jong ka jylla. U la pynpaw ka jingkyrmen ba ka sorkar kan shim khia khamkloi ban pynbeit ïa kane ka jingeh bad ban pynbha ïa ka jingim jong ki longïing kiba shah ktah.
