Shillong, K’ lyngkot, 09: U Bah Esron Marweiñ uba la mih ban ïakhun ïa ka elekshon MDC na Nongthymmai Constituency kum u kyrtong shimet ha ka sngi Palei u la ong ba ka dawbah kaba pyntroiñ ïa ka iktiar jong ki Autonomous District Council (ADC) ka dei namar ka jingdon jong ka Para 12 A.
“Ka Para 12 A ka kren shai ba lada ki aiñ jong ka District Council ki ïa tyngkhuh bad ki aiñ jong ka Sorkar Jylla, ki aiñ jong ka Sorkar Jylla kin ieng bad ki aiñ jong ka District Council kin ïap,” la ong u Bah Esron haba kren sha ki lad pathai khubor ha ka sngi Palei.
“Lada nga shah jied kum u MDC ngan ïakhun ban pynduh noh ïa ka Para 12 A khnang ba ka District Council kan ïoh ïa ka bor laitluid,” u la bynrap.
“Ka jingmih shakhmat ba ngan ïakhun ïa ka elekshon MDC ka long ban weng ïa ka Para 12 A. Kata ka dei ka nongrim kaba skhem ba nga ieng. Ka jingdon jong ka Para 12 A ka pyndkoh shi bun shah ïa ka jingtreikam jong ka District Council,” la ïaiban u Bah Marweiñ.
“Hangne ka pyni shai ba ïa ka District Council la pynïaid da ka Sorkar Jylla lyngba ka tnat District Council Affairs (DCA),” la kynthoh u Bah Marweiñ.
“Ha ka jingïapynbeit pud (hapdeng ka Meghalaya bad Assam), ka jingdon jong ka Para 12 A, mano ba long trai ïa ki jaka ki puta bad kiba ïasoi ïa ka Stanstill Agreement bad ka Sorkar India hato ym dei tang ki 25 tylli ki Hima kiba don hapoh ka shatri jong ka Federation of Khasi States (FKS) hynrei ha kaba kut mano ba leit ban ïapynbeit ïa u pud u sam hato kam dei ka Sorkar. La long thik kumba u nongshongwai u leit pynbeit ïa u pud u sam jong u trai iing. Kane ka dei kawei ka daw ba ka District Council kam ïoh lad ban tuklar,” la kynthoh shuh shuh u Bah Marweiñ.
“Ha kaba ïadei bad ka jingai laisen tih marpohkhyndew, dei ka Sorkar Jylla kaba shna ïa ka Meghalaya Minor Minerals Concession Rules, 2016. Kane ka Rule ka buh jingeh haduh katta katta ia ngi ki trai jylla, ma ngi kum ki trai lum trai wah ngim lah ban trei ïa kane ka kam. Ka eh haduh katta katta. Kane ka jingdkoh ka long tang na ka daw ba ka District Council kam ïoh ïa ka bor ban peit ïa ka bha ka miat jong ki paid ka Bri u Hynñiewtrep.
“Lada ngi peit bha ïa ka rukom bhah pisa, ha ka jingtih dewiong ka jingrem ka Challan bad kiwei kiwei. Katba ka jaka ka hap hapoh ka jingkhmih jong ka District Council hynrei katno ka ïoh bhah ka District Council na ki marpohkhyndew. Kane ka dei ka jingkylli kaba nga kwah ban buh. Wat ki khyrdop jong ka District Council tang shu bakla tiak la shah weng lut. Kane ka pyni ïa ka jingtlot bor jong ka District Council. Ki daw tynrai baroh ki dei na ka jingdon jong ka Para 12 A,” la ong u Bah Marweiñ bad bynrap, “lada kam don ka Para 12 A ngi lah ban ong ba ka District Council ka ïoh ïa ka iktiar kaba laitluid hynrei ngi ïohi ba ka District Council jong ngi kam long kaba laitluid ban synshar hi dalade ïalade hynrei la tuklar da kiwei pat. Kine ki dei ki dawbah ba nga ieng ban ïakhun ïa ka elekshon.”
“Nga la wad bniah ban iit ba ha kano ka nongrim ki paidbah kim don shuh ka jingshaniah ïa ka District Council. Ka dawbah ka dei ka jingdon jong ka Para 12 A. Ka daw tynrai jong ka District Council ka tlot na ka jingdon jong une u sohkyrdot (Para 12 A),” la ong shuh shuh u Bah Marweiñ.
“Ka bor kaba ki Autonomous District Council ki ïoh lyngba ka Sixth Schedule ka long kaba khlaiñ haduh katta katta. Ha ka jingthaw aiñ, ngi ïoh ban thaw aiñ halor ka khyndew ka shyiap, ka riti ka dustur. Kaba ar, ka dei ka bor synshar, kane ka aibor ïa ki Syiem bad ïa ki Rangbah Shnong bad kaba la lai ka dei ka bor bishar ha kaba ngi la lah ban buh ïa ki kashari bapher bapher. Kawei pat ka dei ka bor ban pynmih khajna ba ka Council ka lah ban lum ïa ki khajna bapher bapher bad ban pynmih ïa ka hukum ïa kiba tih marpoh khyndew,” la pynpaw u Bah Marweiñ.
“Ka bhah jong ki District Council ka don. Lyngba ka Consolidated Fund ka District Council ka lah ban aplai ïa ka bhah pisa na ka bynta ka jingtreikam jong ka District Council. Sa kawei pat ka dei ki kam pynroi pynroi kiba ka District Council ka lah ban pyntreikam ïa ki projek kiba wan lyngba ka Sorkar Pdeng,” la ong u Bah Marweiñ.
Haba kylli, u la ong, “kane ka aiñ baroh ka dei tang ha ka rai jong u President ka ri India hynrei mynta ngi ïohi ïa ka jingkulmar tang ha ha ka jingïaknieh shuki hynrei ïa ki aiñ ngim don ka jingïakren bad la ïakren beit tang ïa ki skhim pynroi.
