Shillong, Nohprah, 19: Ki paidbah ka shnong Daistong ki la pynpaw ïa ka jingsngewsih bad ka jingdukha mynsiem namar ka jingbym ïohlad ban pynpaw ïa ka jingpyrshah ha ka public hearing ba la pynlong da ka Meghalaya State Pollution Control Board (MSPCB) ha madan Mooki hajan Lumchyrngan ha ka sngi Thohdieng halor ka jingtyrwa jong ka Shree Cement Limited ban shna ïa ka karkhana ha ka shnong Daistong, kaba hap hapoh ka Elaka Nongkhlieh, East Jaiñtia Hills District.
Ki paidbah ki la kynnoh ruh ba kane ka jingshah khanglad jong ki paidbah ka shnong Daistong ban leit sha ka Public Hearing ka dei beit ka jingrhah spah jong ki nongïalam ka Elaka Nongkhlieh bad ki nongïalam shnong namarba kiwei kiwei ki shnong kiba don marjan ki ïoh leit da kaba suk sha ka Public Hearing katba ïa ki paidbah ka shnong Daistong la pakhang lynti bad ym shym la shah satia tang na ka daw ba ki pyrshah bad rah lama iong.
Shwa kane ki paidbah kiba thmu ban leit sha ka public hearing ki la shah khang lynti lypa dang step phyrngab ha ka shnong Tongseng da kaba la pynieng da ka trok hapdeng surok bad ba la ai daw ba ka trok ka la sniew.
Ka la mih ruh ka jingïania bad ka jingïatim sih tim sang ha kane ka jaka ba shah khang lynti ha ka shnong Tongseng.
Ha kane ka jaka la don lang ruh u President ka Hynñiewtrep Integrated Territorial Organisation (HITO) u Bah Donbok Dkhar uba la pynpaw ka jingsngewbitar ïa kane ka jingleh jong ki nongïalam jong ka Elaka Nongkhlieh bad kumjuh ruh ki bor Pulit.
U la ong ba ki Pulit ki long shu long tang kum ki nongpeitkai bad kane ka jingleh jong ki ka pyni ba kim dei shuh ki briew jong ka aiñ naba ki hap kohnguh pynban ïa ki briew kiba pynïaid ïa ka public hearing.
Ki la don tang 114 ngut ki paidbah kiba la poi sha ka public hearing kiba la ai jingkyrshan ïa ka Shree Cement Limited ban shna ïa ka karkhana ha ka shnong Daistong.
Napdeng ki 114 ngut, ki don 4 ngut ki nongkren ban pynsngew ïa ka jingkyrshan jong ki ïa ka Shree Cement Limited bad kine ki kynthup ïa u Executive Member jong ka Elaka Nongkhlieh u Bah Wilingson Sukhlaiñ, u Secretary jong ka Eleka Nongkhlieh u Bah Fenching Bareh, u Dolloi ka Elaka Nongkhlieh u Bah Na-o-Sukhlaiñ bad u Wahbeh Shnong ka Lumchyrngan u Bah Rimi Shadap.
Kham pajih na kane ka jaka pynlong ïa ka public hearing la ïoh ruh ba ka la don ka jingïakynrup para kynthei kata hapdeng ki longkmie kiba khang lynti bad kito kiba thmu ban leit sha ka public hearing.
Nalor ki paidbah kiba shah pakhang lynti, ki la don ruh ki sengbhalang ba kynthup ïa ka Khasi Students Union (KSU) East Jaiñtia Hills District, ka Jaiñtia National Council (JNC) bad ka Hynñiewtrep Youth Development Council (HYDC) bad kiwei pat ki seng kiba thmu ban leit sha ka public pearing ki la shah beh noh tang na shiteng lynti ha ki Volunteer jong ka Elaka Nongkhlieh kiba la kah dur khmat ïalade da kaba teh jaiñ iong.
Ki sengbhalang ki la shah beh tang na Lad Tongseng Nongkhlieh na ka jaka kaba ki Volunteer ki la ap lypa ban ym shah ïa ki briew kiba nabar jong ka Elaka Nongkhlieh ban ïashim bynta ha ka public hearing.
Ka la mih ruh ka jingïapyni nia hapdeng ki kynhun kiba pyrshah bad ka kynhun kiba thmu ban leit sha ka public hearing hynrei ki Volunteer ki la ong ba kim dei ban wan batai stad ïa ka kam kaba hap hapoh ka Elaka Nongkhlieh.
La sakhi ruh ba ki paidbah kiba pyrshah ki la rah da ki lama iong bad pyrta pynrem ïa ka Shree Cement Limited kaba thmu ban wan seng karkhana dewbilat ha ka shnong Daistong, Elaka Nongkhlieh.
