Shillong, Rymphang, 25: Ka Federation of Khasi Jaiñtia and Garo People (FKJGP) Mawlai Circle ka pynpaw ïa ka jingsngewkhia kaba khraw hadien ka jingsaphriang sted jong ki katto katne tylli ki Video ha ka rynsan Social Media ba la ringdur da ki riewpaidbah ïa ka jingïashoh ïadat hadeng ki nongkyrshan jong ki seng saiñpyrthei hadien ba ladep pynbna ïa ka result jong ka MDC Election 2025.
Ka jingmih kum kine ki jingïashoh ïadat ka la pynhiar dor ïa ka akor ka burom jong ka jaitbynriew bad kum ka seng kaba imsngi ban peit na ka bynta ka bha ka miat jong ka shong ka thaw bad ïa ka jaitbynriew hi baroh kawei bad ka bym ïashah liang ha ka kam saiñ hima sima ka pynrem jur ïa kum kitei ki jingjia kiba lah ban ktah ïa ka shongsuk shongsaiñ ha ka shnong Mawlai pyllun hi baroh kawei, ong u kyrwoh ba la phah da u General Secretary u Bah Varzellino Lyngdoh.
Ka seng ka kyntu ïa ki shnong ki thaw ba kin long kiba peitngor ïa kiba kum kitei ki jingjia bad ha kajuh ka por ka kyntu ïa ki bor jong ka aiñ ba ki dei ban shimkhia halor katei ka bynta khnang ba kan ym ktah ïa ka shongsuk shongsain ha ka shnong Mawlai.
Kum ka seng kaba iengskhem halor ka nongrim ban ïada ïa ka jaitbynriew ka dap da ka jing sngewkhia kaba khraw halor ka jingmih jong kum kitei ki jingjia namar ha ri bad ka jylla hi baroh kawei ka ju phaikhmat sha ka shnong Mawlai ba ka dei ka shnong kaba ïa im ïa sah tang para jaitbynriew Khasi bad ka shnong kaba ju kyrshan tylli ïa kino kino ki jingïakhih jong ki kynhun bapher bapher na ka bynta jong ka ri bad ka jaitbynriew, hynrei ka jingmih kum kitei ki jingjia kan pha lang da kumwei pat sha kiwei pat ki jaitbynriew kiba ap khmang ban pyn ïapait ïapra bad ban pharia ka ka jaitbynriew Khasi.
Ka FKJGP Mawlai Circle ka kren da kaba shai ba kum ka seng ka pdiang ba kita ki nongkyrshan jong kano kano ka seng saiñhima ki don hok ban leh kmen leh sngewbha hadien ba u kyrtong uba ki kyrshan u la ïoh ïa ka jingjop hynrei kim dei pat ban pynmih ïa ki kynrum kynram da kaba leit ban pynshrai lane pynbitar ïa ki kynhun kiba mad ïa ka jing shah rem namar katei ka jingleh kan sa ktah ïa ka jingïalong shitylli jong ki paid nong shnong shong jong ka shnong Mawlai hi baroh kawei tang namar uwei u ar kiba buaid politics bad kum ka seng kan ym lah satia ban shu long tang ki nong peitkai haba mih ka jingïashrut hapdeng ki para nong shnong shnong kiba dei ki paradoh ki para snam.
Ka Seng ka kyntu ïa ki paidbah ba kin long kiba duriap kumno ban ïatei ïa ka jaitbynriew namar ba ka election hi ka wan tang shisien san snem ym ban ïa buiaid elekshon sah lane ban ïaleh pyrshah sah ha baroh ki san snem.
