Shillong, Nailur, 23: Ka Tour Guides Association of Meghalaya (TGAM) ka la pynpaw ïa ka jingsngewkhia halor kawei ka jingjia ba dang shen ha kaba ïadei bad ka kam jngohkai pyrthei kaba la pynmih ïa ka jingsngewkhia halor ka nam ka burom jong ka jylla kum ka jaka jngohkai pyrthei kaba shngaiñ bad kaba don ka jingkitkhlieh.
Ha u kyrwoh khubor ba la phah ha ka sngi Baar u General Secretary jong ka seng u Bah Gerald Samuel Duïa u la banjur ïa ka jingdonkam jong ka kam jngohkai pyrthei ha ka ïoh ka kot jong ka Meghalaya bad ïa ka jingim jong ki hajar tylli ki longiing kiba shaniah ha kane ka kam.
U la pynpaw ruh ba kum kine ki jingjia kum kawei kaba ladep jia kaba lah ban ktah beit beit ïa ka khih ka kamai jong ka jylla bad ka jingpynneh pynsah ïa ka pateng tynrai ba kyrpang jong ka.
Ka seng ka ngeit ba ka jingïakren kaba tei, ka jingtreikam kaba ïadei hapdeng ki kynhun bapher bapher bad ka jingshai jong ki polisi ki long kiba donkam ban ïada na ka jingmih biang kum kine ki jingeh.
Ka seng ka la kyntu ruh ïa ka Sorkar, ki kynhun kiba ïatreilang, ki nongïalam shnong bad baroh ki kynhun bapher bapher ha ka kam jngohkai pyrthei ban ïatreilang ban ïada ïa ki jingmyntoi jong ki nongshong shnong katba dang pynneh ïa ka jinglong kaba pdiang sngewbha ïa ki nongwan jngohkai.
“Ngi dang ïai bteng ban tei ïa ka rukom jngohkai pyrthei kaba la pynïaid da ka imlang sahlang, kaba lah ban pynneh pynsah bad kaba burom ïa ka pateng jong ka Meghalaya, katba ngi ai ruh ïa ki jingsngewtynnat ïa uwei pa uwei u nongwan jngohkai,” la ong u Bah Duïa.
