Shillong, Risaw 10: U Nongïalam ka Liang Pyrshah u Mukul Sangma u la pynpaw ka jingsngewkhia halor ka jinglong jingman ka jinghiar ka shongsuk shongshngaiñ ha Meghalaya, kyrpang halor ki jingjia shah pynïap ki khynnah rit.
Katkum ka jingong jong u, ka donkam ïa ka jingsngewthuh kaba shai halor kane ka jingbym ïaid katkum ka aiñ kaba long kyllaiñ bad ki kam runar kiba jia ha ka jylla.
Haba kren sha ki Lad pathai khubor ha ka sngi Thohdieng u Sangma u la banjur ïa ka jingdonkam ban ïakren halor ki kam runar kiba rit ba ria kaba u la ngeit kiba lah ban kiew sha ki jingjia kam runar kiba heh shuh shuh.
U la kdew ba ki jingjia ki kam tuh, ka jingtuh ïa ki jingri, bad kiwei ki kam runar ki la nangkiew bad ki la long kiba la ju ïai jia bha ha ki thaiñ nongkyndong, kiba barabor ki donkti ki seng kiba la pyntbit ha kane ka kam.
U Sangma u la pynrem jur ïa ka sorkar ba ka khlem leh eiei kaba biang ban
pynkhlaiñ ïa ka tnat pulit da kaba kdew ba ka jingduna ki nongtrei ka dei kawei na ki daw kiba kongsan.
U la pynpaw ruh ba u la dep ban kren bad u Senior Superintendent of Police (SSP) uba la pynpaw ïa ka jingeh na ka jingduna ki nongtrei kaba la ktah ïa ka jinglah ki pulit ban ïakhun ïa kine ki kam runar.
U Myntri Rangbah barim ka jylla u la buh ruh ka jingkylli ïa ka jingangnud ka sorkar ban pyntreikam ïa ka Meghalaya Resident Safety and Security Act, kaba la pynwandur ban pynkupbor ïa ki dorbar shnong bad ki nongshong shnong ban ïatreilang ban ïakren ïa ki lad jingïada bad ki jingshngaiñ.
U la kdew ba ki kyndon kiba don hapoh ka Act kum ka jingpyndait ïa ki CCTV ha ki jaka kiba don jingma, ka khlem treikam pura.
U Sangma u la pynpaw ka jingsngewkhia halor ki kam kiba thylli ha ki police station bad battalion, kaba u la ngeit ka dei ka jingpyrshang ba thmu ban pyntlot ïa ki kam jong ki pulit.
U Nongïalam ka Liang Pyrshah u la banjur halor ka jingdonkam ka “Safe and Secure City” program kaba u la pynlait ha ka por ba u dang long u Myntri Rangbah ka jylla.
“Kynmaw ha ka por jong ngi haba ngi ïoh ka lad ban pynïaid ïa ka sorkar, ka la don ka program kaba nga la plie kaba ïadei bad ka Shillong, Safe and Secure City, bad kaba la leh ruh ha Tura, bad kane ka juh ruh kaba la thmu ban pynïar sha kiwei pat ki district capital, namar ki jingjia halor ka shongsuk shongshngaiñ bad ki jingjia ki kam runar. Mynta baroh kiba ngi la buh la thaw kum ka jingdonkam ban pyndait ïa ki CCTV bad baroh kine ki jingtei ki la shu jah kynsan,” u la ong.
