Shillong, Nailar, 04: Ki arngut ki khun ki la mudui da ka ejahar sha ki Pulit ka Amlarem Police Station pyrshah ïa u kpa u Bah Kmen Pohthmi halor ka jingkynnoh ba u la pom pyndkut da ka wait na ka kti kadiang jong ka kmie ka Kong Inmon Sumer, kiba shong basah ha ka shnong Krangpamtadong, Amlarem Civil Subdivision, West Jaiñtia Hills District.
Katkum ka ejahar, ki khun ki la pyntip ba kane ka la jia ha ka 2 tarik mynta u bnai ha ka por kumba 12.30 baje mynsngi, katba ka Kong Inmon ka dang bamja bad u khun shynrang, u Wanmi Sumer, kynsan kynsan u Bah Kmen Pohthmi u la rung ha kamra shetja bad ka tukri ha kaba u la pom ïa ka kti kadiang jong ka Kong Inmon haduh ba kan da dkut.
U Wanmi Sumer, u khun uba don lang ha kane ka por u la pyrshang ban ai jingïarap ïa ka kmie hynrei u la ngat pynban ha ka jingshah pom pynmynsaw da ka tukri na ka ngab ha la u jong u kpa.
Ki khun ki la ïathuh shuh shuh ba u Bah Kmen Pohthmi bad ka Kong Inmon Sumer ki la ïashong ïasah la kumba 27 snem bad la kynnoh ba u Bah Kmen Pohthmi mynta la kumba katto katne bnai u la waddaw la bunsien bad pynmih ruh ïa ka jingïakajia hapoh ka iing ka sem.
Ka ejahar ka la ïathuh ruh ba ki khun kiba don sha kiwei pat ki kamra tang shu ïohsngew ïa ka jinglynñiar ki la mih ban leit ai jingïarap bad ban pynkit noh marmar sha Woodland Hospital Jowai bad kumba ka long mynta ka Kong Inmon Sumer ka dang don hapoh Intensive Care Unit hapdeng ka jingshitom bajur bad kumjuh ruh u Wanmi Sumer u dang don ha kane ka hospital.
Ki khun ki la dawa ïa ki bor Pulit ba kin kem mardor ïa u kpa, u Bah Kmen Pohthmi bad ban pynngat ïa u ha ki kyndon aiñ ba tyngeh namar ka jingthmu ban dkhat jubor ïa ka jingim jong ka kmie bad ki khun.
