Shillong, Ïaïong, 26: Ka Meghalaya Commercial Truck Owners and Driver Association (MCTO&DA) ka la kynnoh ba ki don ki kynhun kiba ju pyndik ïa ki nongñiah trok da kaba dawa pisa jubor ha shilynter ka surok Mawmaram-Lad Umsaw.
Kane ka jingkynnoh jong ka seng ki trai bad ki nongñiah trok ka long katkum ka jingujor ba la ïoh pdiang na ki nongñiah trok kiba ju shah pyndik na ka por sha ka por haba ki ïaid lyngba na ka surok Mawmaram-Lad Umsaw hadien ba ka Sorkar Jylla ka la khang ïa ki trok kit mar ban ïaid lyngba na ka jingkieng Umïam.
Ha ka jingïakren bad ki lad pathai khubor u President jong ka seng u Bah Moslander Marngar u la ong, ‘ha ka surok Mawmaram-Lad Umsaw ka jur bha ka jinglum pisa. Ki la don ki khep ruh ba ngi la ïa mynsaw. Ki la mih ruh ki khubor ba ka la don ka jingshah thang jong ka Toll Gate. Ngi, ki nongïalam ngi ïaleh ban pynsngewthuh ïa ki dkhot lajong. Nga kwah ban ïathuh ba ki nongñiah trok kiba long ki dkhot jong ngi, 90-95 percent ki dei ki bym nang ïa ka thoh ka pule.”
“Ki don ki dkhot kiba lyngkot ka jingmut jingpyrkhat bad teng teng ki don ki bynta ba ki sngew ba kin shim noh ïa ka aiñ ha la ka kti, kum ki nongïalam ngim ju shah ban ïaid da kata ka lynti. Ka jingshim pisa na kane ka surok (Mawmaram-Lad Umsaw) ka jur bha, la ka long na ki riewshimet, na ki kynhun lane na ki khyrdop kiba lum khajna. Na ka liang jong ngi, ngi ju pyneh bad ngi ju pynibor bad ka jingpynmih ïa ka hukum (da ka Deputy Commissioner jong ka East Khasi Hills dang shen) ka don kaei kaei shalyndet. Ban lait na kita kiei kiei baroh bad ban lap ïa ki jingshisha ngi hap ban ïakynduh ïa ki bor ba halor.”
Haba kylli, u la ong, “ki khyrdop ba la thoh shai ïa ka Signboard ka dei jong ka District Council bad na ka Hima Mylliem. Hynrei lada pynmih ïa ka hukum ka bym shai, ki don ki kynhun (kiba shim kabu) kiba pyntieng ïa ngi da ka aiñ bad ki pyni da ka jingkren jong u MP (ka Shillong Dr. Ricky AJ Syngkon ha Parliament) ha YouTube da kaba kam ba ka dei ka surok High Level bad kynnoh trok High Level bad ong ruh ban thad ha kotkhubor bad lada kren ïa kaba dei ruh kiba lum pisa ki pyndonkam beit kum ka atiar ban lum pisa. Kata ka dei kaba shai bha.”
Haba phah jer kyrteng ïa ki kynhun kiba donkti ban dawa pisa u President ka MCTO&DA ula kyntait da kaba ong, “kam long kaba dei ban ïa thad paramangi. Hynrei ngan ïathuh shai ba ki kynhun (lum pisa ki don) hynrei ym baroh. Ki don ruh ki (nonglum pisa) kiba shim da ka kyrteng jong ki seng treimon sngewbha ba kin dawa pisa na ngi. Kata ka don bad ngim lah hi ruh ban len.”
“Ïa ki khyrdop lum khajna ngi la kren shai mynta (ha ka jingïalang) ba ngin ai da kaba tyngeh namarba ngi la sngew jynjar ngi la sngewlynga ïa ka jingdon jong ki khyrdop lum khajna ngin ïakhun beit lada ka poi sha uno uno u pud, khamtam eh ïa ki khyrdop lum khajna jong ka District Council bad ka Hima Mylliem,” u la ong.
“Dei sa tang ka Hima Mylliem kaba dang buh ïa ka khyrdop lum khajna katba kiwei kiwei ki Hima kim don shuh ïa ki khyrdop lum khajna. Mynta ngi la ïa rai ba ong ïa ki nonglum khajna lada phi dang ïai khrong pisa ngin leh da kaba tyngeh lada ka poi shano shano ruh,” u la ong.
U la ong ba ka shong sa ha ka tnat Pulit kumno ban tehlakam ïa ka jingdon jong ki nongkhrong pisa be-aiñ namarba ka surok Mawmaram-Lad Umsaw shi bynta ka hap hapoh ka Eastern West Khasi Hills, shi bynta ka hap hapoh ka East Khasi Hills bad shi bynta ka hap ha Ribhoi District.
“Sa tang lada ka tnat Pulit jong ka Eastern West Khasi Hills, East Khasi Hills bad Ribhoi District ki treilang kan long hynrei ka shem jingeh bha. Ngi ladep pyntip sha u SP bad sha ki DC bad ki la kular ban pynmih da ka hukum ban ym don shuh ki nong dawa pisa ha surok,” la ïathuh u Bah Marngar.
U la ïathuh ba ka jingeh kaba mih ka long namarba ki nongdawa pisa ki mih teng teng ha ka por mynsngi bad teng teng ha ka por mynmiet. “Don ki khep leilei ba ki pakhang da ka kali hapdeng surok shiteng miet namarba ïa ngi (ka sorkar) ka phah ïaid mynmiet. Don ki khep ba 12:30-1:00 baje mynstep ki (nongdawa pisa) ki khang kdong ïa ki trok ha surok. Ban shu kren ka suk sa tang lada ki Pulit ki shong lang ha kali jong ngi kin sa tip ïa ka jingeh.”
