Shillong, Jylliew, 08: Ha ka step phyrngab sngi u Blei ha ka por kumba 4:00 baje mynstep, ki dkhot ka Hynñiewtrep Youths Council (HYC) Jatap bad Shella Area Unit ryngkat ka jingïarap jong ki nongshong shnong ki la ïoh bat ïa uwei u mynder Bangladeshi ba la tip kyrteng kum u Muhammud Husain, uba donkti ban pynrung tuh sha ka thaiñ Shella ïa ki mynder Bangladeshi da ka jingïarap lang jong ki arngut ki bar jylla nong India kiba sah ha ka shnong Kalibari ba la tip kyrteng kum u Bono Biswas bad u Subash Baidya.
Ïa kane ka jingjia, ka HYC ka la pyntip sha u Superintendent of Police ka East Khasi Hills Bah Vivek Syiem, sha u SDPO ka Sohra Sub-Division bad sha ki heh ka tna shipai BSF Meghalaya Frontier na ka bynta ban shimkhia ïa kane ka kam.
Kane ka jingpynap shrip jong ki dkhot ka HYC ka long hadien ba ki la ïoh jingtip ba ki don ki mynder Bangladeshi kiba rung shapoh u pud u sam ka ri India lyngba ka khappud jong ka thaiñ Shella kata ka Patharghat bad Kalate, la ong u kyrwoh ba la phah da u President ka HYC-Jatap Unit u samla Pyndap Shongwan.
Ka seng ka la ïathuh ba u Hussain u la phla ba kiwei ki mynder ri kiba wan lang bad u ki la lait phet na jaka ba la ïoh bat ïa u bad katto katne ki la phet sha ka ri Bangladesh bad katto katne ki la rung sha India.
“Ha ka jingtohkit u Hussain u la pyntip ba u dei na ka ri Bangladesh bad ha kane ka sngi u la rung tuh sha India ban ïarap ïa la ki para mynder ri lajong ban ïoh rung tuh sha shapoh India bad ban leh ïa ki kam khaii tuh bad ban tuh ïa ki tiar ki tar da ka jingïarap jong ki arngut ki nong India kiba shong basah ha ka shnong Kalibari kiba la tip kyrteng kum u Bono Biswas bad u Subash Baidya,” la pyntip shuh shuh u kyrwoh na ka HYC.
“Ïa kane ka kam pynrung tuh ïa ki mynderi Bangladeshi, la leh lyngba ka jingïarap jong kitei ki arngut ki nong India bad u mynder Bangladesh (Muhammud Hussain) u ïoh kumba T. 1000 na uwei u ne ka briew ba ki pynrung tuh sha India. Ïa ka jingsiew sha kitei ki arngut ki nong India une u briew (Muhammud Hussain) um don jingtip. Ka kamram jong u ka long ban pyllait ne ïalam lynti ïa ki briew na ka jingker (sainar shiah) ba don ha khappud bad hadien kata yn sa wan shimti da ki arngut (u Bono Biswas bad u Subash Baidya) ban ïalam Shillong bad sha kiwei kiwei ki jaka,” la ong u kyrwoh.
“Kat kum ka jingïathuh jong une u mynder Bangladeshi la ong ba kane ka jingpynrung ïa ki mynder ri na ka Bangladesh sha India lyngba ka Khappud ha ka thaiñ Shella ka la ïaid mynta la shi bnai tam bad manla ka miet kumba 10 ngut eiei ki mynder Bangladeshi ki pynrung sha India ba kynthup ruh ïa ki kynthei,” la ong shuh shuh u kyrwoh bad bynrap, “tang u (Muhammud Hussain) marwei ruh u ladep ban pynrung kumba 50 haduh 60 ngut eiei (ki mynder ri) ha kine ki khyndiat sngi.”
Ïa u Muhammud Hussain la aiti noh da ka HYC sha ki Pulit jong ka Shella Police Station bad dawa ruh ba dei ban shimkhia ban pynlong ïa ka jingtohkit kaba bniah halor ki jingphla jong u.
Ka Seng ka la dawa ruh ïa ki Pulit ban thwet bad ban kem ïa ki Dalal na ka ri India kiba la paw kyrteng haneng.
Ka HYC ka la kyntu ruh ïa ki bor Pulit bad ïa ki shipai BSF ban shimkhia bha ïa kane ka kam khnang ban lap ïa baroh kiba donkti ha kane ka kam khaii briew lyngba ka khappud bad kumjuh ruh ban lap bad ban ïohkem ïa baroh ki briew kiba la wan rung tuh shapoh u pud u sam jong ka ri India katkum ka jingphla jong u Muhammud Hussain.
Na ka liang ka seng kan sa nang peit pyrman ïa kine kiei kiei nangne shakhmat ruh.
