Shillong, Nailur, 25: Ki nongïalam jong ka Khasi Students Union (KSU), War Jaiñtia Circle bad ki nongshong dukan ki la kyntu ïa ka Sub Divisional Officer jong ka Amlarem Civil Sub Division, West Jaiñtia Hills District ba kan tuklar lem halor ka jingkhang jong ka tnat Jngohkai Pyrthei ïa ka lynti ïaid kjat ka ban poi sha kshaid Krangshuri namarba ka la pynduhnong haduh katta katta ïa ki trai shnong kiba im kamai jakpoh na ki kam jngohkai pyrthei.
Ha u kyrwoh ba la phah sha ki lad pathai khubor, ka KSU ka la pyntip ba ka jingkhang dam jong ka tnat Jngohkai Pyrthei ïa ka lynti ïaid ka dei namar ka jingtwa ka kynroh hapdeng ka lynti ïaid kjat naduh u bnai Jylliew, 2025 hynrei kaba pynlyngngoh pat ka long ba wat hadien lai bnai kynthih ym pat shym la lah satia ban shna pynbha ïa ka kynroh kaba la twa.
Ka seng ka la pynsngew ruh ha ka SDO ba ka pyrshah jur ïa kino kino kiba pynjulor ïa ki jingtei sahnam ki menbarim kiba la neh da ki spah snem kiba don ha shilynter ka lynti ïaidkjat kiba kynthup naduh ka lynti ïaidkjat bad ka jingkieng maw.
Ha kaba ïadei bad kane, ka SDO ka la kular ba kan sa shimkhia mardor ïa kane ka jingeh ki nongshong dukan bad riewpaitbah bad ka la kular ruh ba kan sa bthah ïa u trai ba un shna noh mardor ïa ka kynroh kaba la twa khnang ba kan ym pynwit ïa ka lynti ïaidkjat.
