Shillong, Jymmang, 02: Uwei u nongniah kali ba la tip kyrteng kum u Bah Lando Shylla u la duh noh ïa la ka jingim hadien ba ka kali Pickup kaba u la ñiah ka la leit tynrah bad ka trok kaba wan mar pyrshah. Kane ka la jia ha ka sngi Thohdieng ha surokbah NH-6 ha ka shnong Wapung, East Jaiñtia Hills District.
Ki Pulit ki la ïathuh ba ka trok kit mar kaba don ïa u nombar AS 01 LC 5896 kaba la ñiah da u Samir Malakar na Agartala ka dang ïaid na Lumshnong ban leit sha Guwahati hynrei ynda la poi ha surokbah ha Wapung ka kali Pick-up kaba don ïa u nombar ML11-6931 kaba la ñiah da u Bah Lando Shylla na Lumshnong kaba la pynher stet bha ka la leit tynrah beit beit ïa ka trok.
Ki Pulit ki la ïathuh katkum ka jingïohi jong ki nongsakhi, khnang ban lait na ka jingshah tynrah, u nongñiah jong ka trok u la pyrshang ban pynphai ïa ka trok sha kawei pat ka liang hynrei namar ka jingstet jong ka kali pickup um shym la lah shuh ban kiar bad u la shah tynrah markhmat haduh ba baroh ar ki kali ki la julor.
Ki Pulit ki la ïathuh ba u nongñiah jong ka kali pickup u la khlad noh na ka jingmynsaw ha Civil Hospital, Khliehriat. Katba u nongñiah jong katei ka trok pat u la leit aiti noh ïalade bad hadien kane ki Pulit ki la ïalam ban leh ïa ka medical checkup ïa u sha Civil Hospital, Khliehriat.
Ïa ki ar tylli ki kali ki Pulit ki la tan noh sha Kongong bad ka jingtohkit ka la ïaid shakhmat.
