Shillong, Rymphang, 24: Ka National People’s Party (NPP) kaba bat ïa u lakam synshar ha ka jylla ka la shah pynkyndit kumba iuh tdong bseiñ ha ka Voice of the People Party (VPP) kaba la jop 17 seat hadien ka jingñiew vote kaba la long ha ka Lah Sngi u Blei ha ka elekshon sha ka Khasi Hills Autonomous District Council (KHADC) katba ha Jaintia Hills Autonomous District Council (JHADC) ka NPP ka la ïoh khur ïa ka jingjop kaba kynjoh 13 ngut.
Ka VPP ïa kaba la pynkha ha u snem 2021, ka la jop haduh 17 seat ha KHADC, ka United Democratic Party (UDP) ka la jop san seat, ka NPP saw seat bad ka Hill State People’s Democratic Party ka la jop shi seat.
Arngut ki kyrtong Independent ki la mad ïa ka jingjop ha kane ka kynti.
Kan dei ruh ka sien banyngkong eh ba ka seng Congress kam shym la lah ban jop wat tang shi seat ruh ha KHADC.
Ha JHADC, ka NPP kaba la jop 13 seat, ka dang duna sa ar seat ban ïoh ïa ka jingbun paid. Ka VPP ka la jop phra seat, katba ka UDP bad ka Congress ki la jop mar lai seat.
Arngut ki kyrtong Independent ki la jop ha kane ka elekshon.
Wat ka BJP kaba dei ka paralok jong ka NPP ruh kam shym la lah satia ban jop ha kane ka elekshon bad rem lut ha baroh ki Constituency ha KHADC bad ha JHADC.
Ka NPP kaba la jop 13 Seat ka lah ban thaw ïa ka Executive Committee ha JHADC da ka jingkyrshan jong ka UDP namarba ki ïatreilang ha ka Sorkar MDA ba ïalam da ka NPP.
