Tura, K’lyngkot, 07: Ka jingïakajia hapdeng ki arngut ki nongdie kwai ka la poi sha ka jingïadung pynmynsaw ha ka step sngi Baar kaba la jia ha Supermarket, mar pyrshah ïa ka jaka ieng bus MTC ha Tura.
Ka khubor ba la ïohlum ka ïathuh, ba ki briew kiba la sakhi ki la pyntip ba ka jingïakajia ka la mih na ka jingbym ïasngewthuh jingmut hapdeng kine ki arngut, ïa kiba hadien la ithuh hadien kum u kñi bad u pyrsa.
Hapdeng ka jingïakajia, u pyrsa u la dung da ka wait na ka bynta jong ka kpoh
Ki briew kiba la sakhi ïa kane ka jingjia, ki la mareh ban leit ïarap ïa u briew uba mynsaw bad pynkit noh mardor ïa u sha jaka ai jingsumar.
Wat hapdeng ka jingpyrshang, hynrei u kni uba la mynsaw u la khladnoh katba dang don ha lynti.
Kine ki arngut la ngeit ba ki dei na ka thaiñ Mancachar-Singimari, ka thaiñ kaba paw bha ha ka jingkhaii ïa u kwai.
Ki Pulit tang shu ïoh jingtip ki la leit marmar sha kane ka jaka bad kem noh ïa u pyrsa uba dang don ha kane ka jaka bad ha kajuh ka por ki la kurup noh ïa ka wait ba u la pyndonkam ha ka jingthombor.
Ki bor Pulit ki dang pynlong ïa ka jingtohkit ban tip ïa ka daw tynrai halor kane ka jingjia.
