Shillong, Naiwieng, 02: Ka Balang Catholic ha satlak ka pyrthei ha ka sngi Saitjaiñ ka la kynmaw burom ïa ki mynsiem jong ki riewngeit kiba la khladnoh na kane ka sla pyrthei bad ban duwai kyrpang ba kin ban poi suk sha dwar u Blei.
Ha Jyllaniam Bah Shillong, ka Balang Catholic ka la tyrwa ïa ka Mass Bakhuid na bynta ki mynsiem kiba la khlad noh ha kaba u Lyngdohsad jong ka Jyllaniam Bah Shillong u Most Rev. Victor Lyngdoh u la tyrwa ïa ka kñia ka khriam na ka bynta ki mynsiem ba la khladnoh ha ryngkat ka jingsynran lang kiwei pat ki Lyngdoh Sohblei bad ki hajar ngut ki bahaing hasem jong ki riewngeit ba la tep ha u lum jingtep jong ka Balang ha Laitumkhrah.
Ki bahaing hasem kiba la pynkhuid ïa ki lum jingtep, ki la buh ruh ïa ki syntiew ba la thaiñ kum ki pansngiat bad thang ruh ïa ki mombati kiba la pynthaba khrek ïa u lum jingtep.
Hadien ba la kut ka jinglehniam, ki Lyngdoh Sohblei ki la kyrkhu ïa ki lum jingtep ba la synran lang da ki bahaing hasem kiba pynlong ruh ïa ka jingduwai na ka bynta ka mynsiem jong ki bahaing hasem kiba la khladnoh na kane ka pyrthei shiphang sngi ba kin ïoh ïa ka jingjahthait bymjukut.
Ha rilum Jaiñtia, ki paidriewngeit jong ka Balang Catholic ka Jyllaniam Jowai ki la rakhe kynmaw burom ïa ki mynsiem kiba la khladnoh da kaba leit buh syntiew ha ki lum jingtep jong ki bahaing hasem kiba la khlad noh.
Ha Parish Jowai, la rakhe ïa kane ka sngi da ka jingleit buh syntiew ha u lum jingtep jong ka Balang Katholik Jowai kaba don ha Moosalangkat ha kaba la pynlong ruh ïa ka Mass Bakhuid da u Bishop ka Jyllaniam Jowai u Most Rev. Ferdinand Dkhar ryngkat ka jingsynran lang jong ki Lyngdoh Sohblei bad ki riewniam.
