Shillong, ïaïong 12: Ka Khasi Jaintia Churches Leaders Forum (KJCLF) la kyntu ïa ki kyrtong kiba ïakhun ïa ka elekshon ba smai ba kin shakri ïa ki paidbah da ka jingkhuid bad kaba lait na ka jingbamsap.
Ha u kyrwoh ba la phah da u Secretary ka KJCLF Rev Dr EH Kharkongor, u la ong, “kum ki nongshnong ka dei ka jingkitkhlieh jong ki nongthep vote ban ïashim bynta ha ka jingjied nongmihkhmat sha ka Ingdorbar Thawain ka Jylla bad ha ka Parliament khnang ban dup lah ban rai ïa ka lawei jong ka ri jong ngi lyngba ka Sorkar ba la thaw bad ka ban ai ai ka jingshakri sha ki paidbah. Ka elekshon Lok Sabha 2024 ka la hajan bad ka jingkyntu ïa ki nongthep vote ka long ban khie sa shisien pat ban jied ïa ki nongmihkhmat da ka jingshai, ka jingshlur.”
“Ha ka elekshon jong ka Ingdorbar Thawaiñ kaba la long ha u snem baladep ki paidbah nongshong shnong ka Meghalaya ki la pynpaw ïa la ka jong ka mon pyrshah ïa kito kiba mihkhmat ha ka kyrteng ka niam, kiba khim jingmut, jingïaumsnam bad kiwei kiwei ki rukom ba pynmong. Hynrei, ka long kaba sngewsih ban ïohi ïa ki riewshimet kiba pyrta da ka pisa, ka kyrdan bad ka bor ki la pynhiar dor ïa lade sha ka kyrdan ba shah tehmraw haba ki tyrwa ïalade ne shah thied ha ki nongkhaii mraw sainpyrthei kiba ïapein bad ki briew bad kiba pynsawa ïa ki manifesto kum ki jingdie ha ki jaka iew. Ki politishian bad ka Sorkar ki la kylla bamsap ha ka rukom long ka jong ki. Ka bamsap, ki kam runar, ki jingïaumsnam bad ki jingbyrngem. La wanrah da ki aiñ kiba pynmong, ïa ka hok katkum ka riti synshar bad ki hok la shah pynduh, la ailad ïa ka jingïasih khlem da lah ban tehlakam,” ong u Secretary ka KJCLF.
Ka KJCLF ka kyntu ïa ki nongshong shnong ba kin don ka jingkitkhlieh na ka bynta ban pyndonkam ïa ka hok thep vote jong ki ha ka sngi thep vote bad ban rai da ka mynsiem jingïatiplem kaba khuid, da ka jingshlur bad ka jingshemphang ba ngi kwah ïa ka jingkyrmen na ka bynta ka babha bad kaba thymmai.
“Ka Forum ka pynrem jur ïa ki kam ïaumsnam bad ki jingïasih bad ka khot bad wer ïa ki nongmihkhmat paidbah ba kin smai ban ïada ïa ka riti synshar ka ri bad ban shakri ïa ki paidbah na ka bynta ban noh synniang sha ka Sorkar kaba lait na ka bamsap bampong bad ka bym leh donbor hynrei bad ban wanrah ïa ka jingïadei kaba jan hapdeng ki nongshong shnong khnang ban pynneh ïa ka shongsuk shongsaiñ,” la bynrap u kyrwoh.
