Shillong, Nailar 07: U Myntri Rangbah ka jylla u Conrad K Sangma ha ka sngi Palei u la kyntait ïa ki jingkam ki liang pyrshah ba ka sorkar jong u, ka la pyndkoh bad pyntlot ïa ka Garo Hills Autonomous District Council (GHADC), da kaba ong ba kane ka jingjulor ka la sdang naduh ka por ba la synshar ka sorkar Congress ba la ïalam da u Mukul Sangma mynshwa.
U la ong ruh ba dei ha kane ka sorkar ba la ïalam da ka seng National People’s Party (NPP) kaba la shim ïa ki rai kiba eh ban pynbeit ïa ki jingeh halor ka kam pisa jong kane ka Council.
Haba kynthoh ïa ka jingkynnoh jong u nongïalam ka liang pyrshah u Mukul Sangma, u Conrad u la ïathuh ba ki nongtrei ha GHADC ki la don palat 2,000 ngut hadien ba ka NPP ka la shimti ïa ka kam synshar, ha kaba kane ka la long palat ka jingdon ki nongtrei ha kiwei pat ki Autonomous District Council (ADC) ha kaba ïanujor bad ka KHADC kaba don tang 600 ngut ki nongtrei bad ka JHADC kaba don tang 1800 ngut ki nongtrei.
U la ïathuh ruh ba ki sorkar ba mynshwa ki la thungkam khlem da don ki jingmang pisa ne ki service rule, ha kaba kane ka la lam sha ka jingdon ki nongtrei snaïap.
Na ka liang u Conrad u la kam ruh ba ka jingsiew tulop ïa ki nongtrei ka GHADC ka la kot sha ka T. 6-7 klur, katba ka khajna ba la ïoh lum pat ka long tang T. 1-2 klur ha ka shibnai, ha kaba kane ka la wanrah ka jingduna pisa kaba la kot sha ka T. 5 klur.
“Kumta kane ka jingpynjot kaba la ïathuh da u nongïalam ka liang pyrshah ka la sdang naduh ka por jong ki,” u la ong.
U Myntri Rangbah u la ong ba dei ha kane ka sorkar jong u kaba la shim ïa ki sienjam ban wanrah jingkylla ïa ka council, da kaba wengnoh ïa ki nongtrei snaïap bad ka khlem thung ruh ïa ki nongtrei kiba thymmai, ha kaba kane ka la wanrah ka jingduna ki nongtrei haduh 1,300 ngut.
“Nga sngewkmen ban ïathuh ba na ka jingdon ki nongtrei kumba 2000 ngut la lah ban pynduna mynta sha ka 1300 ngut ki nongtrei ha GHADC bad ka daw ka long ba ngi la peit ïa ka thup jingdon ki nongtrei ha kaba la shem ba ki la don bun ki nongtrei kiba ym ju wan trei ne ki nongtrei snaïap, kumta ngi la wengnoh ïa ki kyrteng jong ki bad ngi khlem thung briew shuh naduh kane ka sngi,” bynrap u Myntri Rangbah.
“Kane kadei kaba la jia ha ka council bad lada kynnoh halor kane ka jinglong jingman dei ban peit ruh ïa kaei kaba la jia ha ki por mynshwa,” bynrap u Myntri Rangbah.
U Myntri Rangbah u la ong ruh ba kan ym don ka jingkylli halor ka jingpyndonkam bakla ïa ka pisa T. 100 klur ka fund ba la mang ban ai sha GHADC.
U la pynthikna ba ïa kane ka pisa la pyndonkam haba shit ba shai ha kaba ki la don ruh ki bynta ban siew tulop sha ki nongtrei.
U Conrad u la kam ruh ruh ba ka pisa kaba la pynlait la dep buh bha ha ki jingthoh ha kaba 75-80% ka pisa la pyndonkam ban siew ïa ki tulop.
“Kane ka pisa ka la ïarap ban pynkhuid ïa ka pisa kaba long kumba 25-28 ki bnai, kaba la lumlang naduh ki por jong ki sorkar ba rim,” u la ong da kaba pynthikna ruh ba kane ka sorkar kan trei shitom ban pynbha ïa ki jinglong jingman bad kumjuh ruh ban pynbeit ïa kine ki jingeh haba ïadei bad ka jingsiew tulop ïa ki nongtrei.