Shillong, Lber, 22: Ka Unlawful Activities Prevention Tribunal ka la buh sngi ha ka 9 tarik, Ïaiong kum ka sngi ban shong bishar ïa ka dorkhas ba la phah da ka seng kieng atiar Hynniewtrep National Liberation Council (HNLC) ba la shah khein beaiñ kaba ban ïakhun pyrshah ïa ka rai jong ka Sorkar Pdeng kaba pynjlan ïa ka jingkheiñ beaiñ sa san snem kynthih.
Haba pyntip ïa kane hadien ba la leit mih hakhmat ka Tribunal, u nongïasaid aiñ jong ka HNLC Bah Fernando Shangpliang u la ïathuh ba ka jingbishar la buh sngi ban long ha Guwahati, Assam ha ka 9 tarik Ïaiong.
“Ha ka jingbishar kaba la long mynta ka sngi, nga la pyrshang ban aiti ïa ka jingpynshai katkum ki rul, ka Tribunal kam shym la shah..namarba ka por ba la buh ka dei ha ka 13 tarik, Rymphang, 2025 ban aiti ïa ka jubab ne ka jingujor ha kaba ïadei (bad ka jingshah kheiñ beaiñ) namarba ka Sorkar Pdeng bad ka Sorkar Jylla ki ladep aiti ïa ka jubab (affidavit) jong ki,” u la ong.
“Namarkata ngi hap ban ïaid shakhmat. Kumta, ha ka taiew ban sa wan na ka Sorkar India bad ka Sorkar Jylla kin sa phah ïa ki kopi sha nga ïa ki sakhi ryngkat bad ki jubab bad da kaba pynshong nongrim halor kata, ha ka 9 tarik, Ïaiong, ngan sa khmih bniah ïa baroh ki nongai sakhi ba la aiti da ka Sorkar India bad ka Sorkar Jylla,” la bynrap u Bah Shangpliang.
