Shillong, Risaw, 29: Ki nongïalam jong ka Khasi Students Union, Lyngngam Hynneng Brei Area Unit ha ka Sngi Balang ki la dawa ïa ka Khasi Hills Autonomous District Council (KHADC) ban khynra trading license bad labour license naphang ïa ki dukan jong ki bar jylla kiba leh ïa ka khaii ka pateng ha Ïew Shallang.
Ha ka jingïakren bad ki lad pathai khubor hadien ka jingïakynduh ïa u Chief Executive Member (CEM) ka Khasi Hills Autonomous District Council (KHADC) Bah Winston Tony Lyngdoh, u President ka seng u samla Anselm Ryntong u la ïathuh ba ha ka jingkhynra jong ka seng dang shen ka la lap ba 300 tylli ki dukan jong ki bar jylla bad kumba 600 ngut ki nongtrei ki bym don ïa ka trading license bad ka labour license.
U la ïathuh ruh ba ka long kaba sngewsih ba ki bar jylla kim khein snep satia wat ïa u sordar shnong namarba ki wai ïa ki dukan na ki trai jylla khlem da ïoh shwa ïa ka No Objection Certificate na u sordar shnong.
U la ïathuh ba ka jingjyllei jong ki bar jylla hapoh ka ïew Shallang, West Khasi Hills District ka long kaba ishyrkhei bha bad ong ruh ba wat ka dorbar shnong kam don satia ïa ki jingbuh jingthoh ba thikna ïa ki bar jylla kiba don hapoh ka ïew Shallang.
U la ong ruh ba ka seng ka la sakhi ruh ïa ka jingleh donbor jong ki bar jylla bad nalor kata ki don ruh ki kynthei khasi trai shnong kiba shongkha bad ki shynrang bar jylla kiba haduh mynta kim shym la wan phai shuh sha la shnong.
“Lada ka Sorkar bad ki bor synshar shnong kim lah ban peitngor kan buh jingeh bha ïa ka jinglong jingman ha ïew Shallang namar ki kam ki jam baroh la trei da ki briew kiba shu wan rung nabar ka jylla,” u la ong.
