Shillong, Naiwieng 03: Ka Joint Action Committee (JAC) North Eastern Hill University (NEHU) ka la byrngem ban pynlong ïa ki jingïakhih kiba jur ha ka 13 tarik mynta u bnai halor ka jingkynnoh ba u Vice Chancellor jong ka skulbah NEHU u Prof. Prabha Shankar Shukla u dang ïai leh mynthi halor ki mat jingdawa.
Ki dkhot jong ka JAC ba kynthup ïa ki nonghikai kiba don hapoh ka shatri jong ka North Eastern Hills University Teachers Association (NEHUTA) bad ki samla pule kiba don ha ka shatri jong ka North Eastern Hills University Student Union (NEHUSU) bad ki nongtrei ïa kaba la tip North Eastern Hills University Non Teaching Staff Association (NEHUNSTA) ha ka sngi Thohdieng ki la dawa ïa u Vice Chancellor ba u dei ban weng kam noh mardor ïa u Rohit Prasad ïa uba la thung kum u Technical Advisor hapoh kane ka skulbah.
Ki dkhot ka JAC ki la pyrta shla ba u Vice Chancellor u dei ban mih shabar bad ban weng kam noh mardor ïa u Rohit Prasad hynrei u Vice Chancellor um shym la treh satia ban mih shabar hynrei u la khot ïa ki nongïalam jong ka Joint Action Committee sha ka miej jingïakren katba na ka liang ki nonghikai ki la kyntait mardor ïa ka jingkhot ïakren.
Ha ka jingïakren bad ki lad pathai khubor ki nongïalam ka JAC ki la pyntip ba ka Committee ha ka 13 tarik mynta u bnai, kin dang pynjur shuh shuh ïa ka jingïakhih ban dawa weng kam beit mardor ïa u Rohit Prasad.
