Shillong, Naitung 03: Ka Jaiñtia Students’ Union (JSU) Syndai Unit ha ka sngi Palei hapoh ka jingïalam u President samla Pynshailang Suliang kala leit ban kynduh ïa ka District Medical & Health Officer West Jaiñtia Hills District Jowai, ha kaba ïadei bad ki jingduna jong ka Pdengshakap PHC.
Ha kane ka jingïakren ki dkhot ka seng kila ïoh lad ban pynsngew haka DM&HO hadien ka jingleit jurip (Inspection) ïa ka PHC haka 21/06/2025, da kaba pynsngew haduh lai (3) tylli ki mat jingdaw kiba donkam hapoh katei ka PHC.
Kaba nyngkong ka seng ka lap ïaka jingbym wan trei ki Doctor haka sngi saitjaiñ ha PHC Pdengshakap. Kane ka jingbym wan trei tista ki Doctor khamtam haka sngi saitjaiñ ka pynjynjar shibun ïa ki paidbah nongshong shnong kiba hap hapoh ka jingpeit jingkhmih jong ka PHC Pdengshakap khamtam ïa u duk u suk. Ka seng ka lyngngoh kumno ki Doctor ki kheiñ sting ïa ka pang ka shitom jong ki paidbah hato lah seh ban rah sngi ïa ka pang ka shitom ne ïa ka pun ka kha.
Kaba ar la pynsngew halor ka jingduna ki dawai dashin ha ka PHC bad ha ki Sub-Centre. Ka seng ka la dawa ruh ban pynbiang ïa ki dawai dashin ha PHC bad ha ki Sub-Centre kiba hap hapoh jong ka PHC Pdengshakap khnang ba kan long ka jingmyntoi shibun khamtam ïa u duk u suk.
Kaba lai ka seng kala dawa ruh ba ki doctor ki hap ban leit visit shisien shi taïew ha ki 2 tylli ki Sub-Centre kita ki long ka Syndai Sub-Centre bad ka Tranglang Sub-Centre, khnang ban pynsuk ïa ki paidbah khamtam ki riew tymmen kiba la noh ka rta ki bym lah shuh ban shong kali jngai bad ruh kan ai ka jingïajan bad u paidbah. Ka seng ka pynpaw ba lada ki doctor ki lah ban wan visit man ka por khamtam ha ki por Covid-19 balei pat kim lah ban wan mynta, la pynkut ka kyrwoh na ka seng.
