Shillong, Nailar 31: Ka Hynñiewtrep Youth Council (HYC) ha ka sngi Palei ka la plie paidbah ïa u dur mot ba shi rynïeng jong u Bah Bull N Lyngdoh u President ka barim jong ka Khasi Student Union (KSU) ha Mophran ha ka jingïadon lang ki bahaïing hasem.
Ka jingtei ka HYC ïa u durmot jong u Bah Bull N. Lyngdoh ha motphran ka long namarba ka dei ka jaka kaba une u nongïalam barim jong ka KSU u ju pynkhih paidbah ha ki snem kiba mynshwa ban kren pyrshah ïa ka Sorkar Jylla bad kiwei de ki dawbah jong ka jaidbynriew.
Haba kren ha kane ka sngi u President ka HYC u Bah Roykupar Synrem u la ong ba ka jingkylli ka long hadien u Syiem Tirot Sing, u Woh Kiang Nangbah bad Bah Bah Bull shaei jah kita ki nongïalam jong ka jaitbynriew, balei ka jaitbynriew hynñiewtrep kam lah shuh ban pynmih ïa kita ki nongïalam.
Hadien jong kine ki riewïaleh, ym shym la lah don shuh ki nongïalam kiba don ïa la ka nongrim, hynrei pynmih sa ki nongïalam shisngi ki phong da kawei ka Uniform bad shisngi ki la phong da kiwei pat.
U la ong ba ym ïoh shuh ïa ki nongïalam ki ban pha ïa la ka jong ka jingim na ka bynta ka bha ka miat jong u paidbah, hynrei la ïoh ïa ki nongïalam kiba pyrkhat bad kiba kwah tang ïa ka myntoi shimet, kane ka la dei ka por ba kum ka jaitbynriew kan sei ïa ki nongïalam kiba kumno nangne shakhmat.
“Ka HYC ka ngeit ba ka snam u Syiem Tirot Sing, u Woh Kiang Nangbah, u Bah Bull N Lyngdoh ka dang tuid ha ki thied snam, dei na kata dang don ïa ka jingkyrmen ba kum ka jaitbynriew nangne shakhmat kan dang pynmih ïa ki riewshlur ki khun dap shynrang ki ban ïada ïa ka ri bad ka jaitbynriew,” ong u Bah Roy.
U la ong ruh ba kum ka seng ha kine ki 10 snem ki la mad ïa ki jingeh kum ki dkhot bad ki bor jong ka Sorkar. Dang ha kine ki sngi la ïohi katba ka seng ka dang ïaleh pyrshah ïa u drok ki dkhot ka seng ki la shah khot hajir, ki bor pulit ki don ïa ka bor ban khynra ïa ki drok, ka seng kam don ïa ka bor hynrei ka bor ki ïoh na ki paidbah, ka seng kan ym riej ban ïa khun pyrshah ïa u drok.
Ha kane ka jingïalang la sakhi lang da u Rangbah Shnong ka Malki u Bah P K Sohtun, ka para jong u Bah Bull ka kong Evanjalin Lyngdoh, u Myntri ka Hima Mylliem bad kiwei kiwei ryngkat ka jingsakhi lang jong ki paidbah.
