Shillong, K’lyngkot, 21: Ban pynsah jingkynmaw ïa ka nam bad ka kyrteng jong u MDC barim ka Nongthymmai Constituency uba la khladnoh na kane ka sla pyrthei u Bah Latiplang Kharkongor, ka Khasi Hills Autonomous District Council (KHADC) ka la mang pisa T. 15 lak ban tei da ka Cultural Hall ha ka shnong Nongkhyriem, Nongthymmai.
Ïa kane la pyntip paidbah da u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem haba kren ha ka jingïalang paidbah ba la pynbeit da ka Organising Committee jong ka Nongthymmai Constituency kaba la long ha ka Lah Sngi U Blei ha Jingkieng Nongthymmai, Shillong.
U Bah Pynïaid u la pyntip ba ka jingpyntrei ïa ka Cultural Hall yn sa aiti sha ka Dorbar Shnong Nongkhyriem.
Ha kane ka sngi, la pynkup burom ïa ka iing ka sem jong u Bah Latiplang Kharkongor bad ïa ka kurim ka Kong Mel Wanniang.
Ha kane ka jingïalang ba la sakhi lang da u Bah Bindo M. Lanong, Bah Embhahlang Syiemlieh, ki nongialam jong ka NPP Women’s Wing bad ki nongkitkam jong ka NPP Nongthymmai bad ki paidbah nongkyrshan kiba la pyndap smam ia ka Hall baroh kawei, la pdiang sngewbha ruh ïa ki nongkyrshan jong ka Voice of the People Party (VP), Trinamool Congress, UDP kiba la pynïasoh sha ka NPP.
Kum ban shu pynkynmaw, u Bah Latiplang Kharkongor uba long u President barim jong ka Hynñiewtrep National Youth Front (HNYF) u la shah jied haduh saw samoi kynthih kum u MDC jong ka Nongthymmai Constituency naduh u snem 2004
U la shah jied ruh kum u Chief Executive Member (CEM) jong ka KHADC ha kaba u la shakri naduh u 22 tarik Naiwieng, 2019 haduh ka 20 tarik, Lber, 2020.
U Bah Kharkongor un long u MDC Independent ba nyngkong eh ban shah jied kum u CEM ka KHADC hadien ba ka Executive Committee jong ka kynhun United Democratic Alliance (UDA) ba la ïalam da u Bah Teiñwell Dkhar u MDC ka UDP ka la shah pynliem ha ka jingwanrah ïa ka No-Confidence Motion hapoh ka Iingdorbar Thawain ka KHADC.
