Shillong, K’lyngkot, 19: Hadien 52 snem ka jingïoh jylla bapura, ka Jylla Meghalaya kan sa ïoh la ka jong ka jingrwai ieid ri jong ka jylla.
Haba pynbna ïa kane, u Myntri Rangbah ka Jylla u Conrad K. Sangma u la ong, “nga sngew kmen ban pyntip sha phi baroh ba ïa ka jingrwai ieid ri jong ka jylla la mynjur da ka Kynhun Myntri ka Sorkar mynta ka sngi.”
U Sangma u la pyntip ba un sa pyllait paidbah ïa kane ka jingrwai ieid ri ha ka jingrakhe ïa ka Meghalaya Day ha Tura ha ka sngi Saitjaiñ.
“Kane ka dei ka khyllipmat kaba sngewsarong bad kaba dap jingkmen namarba ka jylla kam don ïa ka jngrwai ieid ri la ka jong mynta la 52 snem,” u la ong.
“Nga ai khublei ïa ka tnat Arts and Culture bad ïa kito kiba la don bynta ban thaw ïa kane ka jingrwai bad nga ai khublei kyrpang ïa ka jingtrei shitom jong ki naduh kaba thoh ïa ki kyntien jingrwai bad ïa ka sur kaba bang,” ula ong.
