Shillong, Nohprah, 16: Ka long ka khubor kaba sngewtynnad ba uwei u samla na ka shnong Shangpung, Khliehrangnah West Jaiñtia Hills District uba la tip kyrteng kum u Da-o-hi Sutnga u la ïoh ïa ka lad ban leit aireng ha ka jingïakob rwai ha ka jingïakhun phainal jong ka rynsan pynisap kaba la tip kum ka India Talent Fight Season-6.
Kane ka rynsan ïakob kan sa long ha ka Jylla Uttarakhand ha ka 20 tarik mynta u bnai.
Ha ka jingïakren bad ki lad pathai khubor ha Shillong Press Club, u President jong ka All Meghalaya Dancer Association (AMDA) Bah Kitbok Thabah u la pynpaw ka jingsngewkmen hadien ba u samla Da-o-hi u la shah jied ha ka jingïakob rwai ha ka India Talent Fight Season-6 lyngba ka online Audition.
U la ïathuh ba naduh nyngkong ïa kane ka rynsan ïa kob pyni sap la sdang da ka offline naduh u bnai Naitung bad mynta u samla Da-o-hi u la shah jied shaduh ka phainal ban ïa aireng pyrshah ïa kiba bun ki nongïakhun na ki Jylla bapher bapher jong ka ri.
Na ka liang u samla Do-a-hi u la pynpaw ruh ïa ka jingsngewkmen hadien ba u la shah jied ha kane ka rynsan ïakob ba heh jong ka ri bad ong ruh ba ka dei ka sien kaba nyngkong eh ïa u ban leit ïakhun shabar jylla.
“Ka dang dei ka sien kaba nyngkong eh ïa nga ban leit ïakhun shabar ka jylla hynrei nga kyrmen ban wanrah nam ïa ka jylla baroh kawei,” la ong u samla Da-o-hi.
