Shillong Rymphang, 02: Ka St. Petrus & Paulus, Parish Pynthorumkhrah, Shillong ha ka sngi u Blei ka la pynlong ia ka proseshon Iukharist bad ka kajuh ka por ka la plie ruh ia ka Jubili Ksiar jong ka Seng Samla.
Da ki hajar ngut ki paid U Blei ki la shim bynta riewblei ha Proseshon Iukharist ha ki jingduwai bad jingrwai.
Ha ka por mynstep la sdang da ka Mass Bakhuid ba la pynbynta da u Sohblei Francis Kharpan ha jingsynranlang da u Sohblei Laurence Nongkseh u Nongsharai Rangbah ka Parish Pynthorumkhrah, u u Sohblei Alister Marweiñ u Lyngdoh synrop, u Sohblei Teles Nonglang Nongsharai ka Parish Mawlai bad kiwei kiwei.
U Lyngdoh Sohblei Francis haba ai jingkren u iathuh hadien 40 Sngi ka jingkha ia u khunlung Jisu ha kane ka sngi ka Balang ka rakhe ia ka jingaiti ia u khunlung Jisu ha ka Temple da da ki kmie ki kpa jong u bad ynda la poi ha Temple u Simeon tang shu ioh kdup ia u khunlung Jisu u la dap da ka jingkmen bad u la duwai.
Ka Parish Pynthorumkhrah ka dei shnat Niam kaba la biang la bit ha ki kam mynsiem bad kiba khlaiñ ha jingiatrei lang jong ki paid U Blei ryngkat ka Parish Pastoral Council.
Ia ka Proseshon Iukharist la sdang na phyllaw jong ka iingmane bad la iaid tawiar ia ka shnong Lumshyiap sha Pynthorbah bad la pynkut biang ha phyllaw iingMane da ka jingmane ia ka Sacrament Bakhuid Tam ka Duwan ba la ialam da u Sohblei Laurence Nongkseh.
Hadien ka Proseshon Iukharist ka Seng Samla Parish ka la plie ia ka lynti jubilee ba 50 snem jong ka naduh ba la seng ha u snem 1975 da u Sohblei Laurence Nongkseh bad la pynbud pat da ka jingkren na u President ka Seng Samla u samla Kit Royney bad ka jingrwai ia ka Anthem jong ka seng samla.
