Shillong, Rymphang, 02: Ka Seng Khasi Kmie ha ka sngi u Blei lyngba ka Lum Sohpetbneng Committee ryngkat ka Komiti u Riew Tymmen Riew San, ka la pyndep ïa kawei na ka nguh Blei Dem Blei ba kyrpang jong ka jaidbynriew Hynñiewtrep Hynñiaw Wasa, ka Kiew Pyneh Rngiew 2025, kaba dei artad ka sien kaba 26, ha kliar u lum kyntang u Sohpetbneng.
Mynta u snem, ka da long da shisha kaba I hun ban peit, namar ba ki paidbah ba dang bat dang ksoh rdin ha la ka jong ka niam tynrai, kampher lada dei ki tymmen ki san, ki rangbah, ki samla, ki khynnah ne wat haduh ki hep kiba rit, ki la kiew arted sha kliar u Sohpetbneng, ban ïoh ban kiew halor ka duwan ka dupat, kaba hangne hapoh ha la ka jong ka mynsiem ban ïa ka nguh ka dem, ka kyrpad ka kyrpon ha khmat u Blei Nongthaw Nongbuh nongsei rynieng nongsei rta, ba un da theh ka kyrhu ka jong u ïa ka jingim kaba man la ka sngi u khun bynriew ba im ba shong bad ba sah hangne ha snieh jong ka sla pyrthei.
Kumba ka juh long shwa ka jingkiew sha kliar u Lum Sohpetbneng, U Riew Tymmen Riew San, u da leit shwa sha ka nguh ka dem, ka shat ka kheiñ ka khnong ka bishar bad ruh ban da thoh ruh da u syiem mawshun, ba un daiñ u khet un khrai ïa ka sabuit ka sakai, ka saw bniat ka saw tyngam, ba ïoh don u nongkyntu u nongkynto na sha lyndet uba thmu ban khanglad khang lynti ïa kane ka kiew pyneh rngiew.
Ynda haba la poi ha kliar u Sohpetbneng, la don ka jingpynkhreh ïa ka duwan ka dupat, kaba ynda haba la biang lut nadong shadong, ka Komiti U Riew Tymmen U Riewsan hapoh ka jingïalam u Chairman u jong ka, u Rgh Skor, Jala, u leit sha ka nguh ka dem, ka kyrpad ka kyrpon sha u Blei Trai Kynrad bad kumjuh sha ki ryngkew ki lei basa ba kin da wan ba kin mih ha kadiang ne ha kamon na shatei na shathie, kum ka dak kaba ki wan ban ïa bynta ne ban synran synriah ïa kum kane ka sngi.
Haba la dep ka nguh Blei, ba la pynkyntang pat ïa ka duwan ka dupat da u khaweh u khaw khien ka um ksiar ka um rupa, bad hadien kane, la ailad pat ïa u paidbah byllien ba kin ïa kiew pat ha duwan ban pyndep ïa la ka nguh ka dem ha khmat u Blei Trai Kynrad.
Shabar ka duwan, ka la don pat ka jingsam ïa u khaw eh u khaw khien bad ka um ksiar ka um rupa, kaba u paidbah un ïoh ban rah rneng pat sha la ïing sha la sem, ban ïa sam ban bam lang ban eh ka rngiew ka rwiang.
Na ka liang u Rgh Skor Jala haba krn bad u nongthoh khubor, u sngew ban pynpaw ba u da dap namar katba shisha da ka mynsiem kaba kmen namar kaba dang ïaid ki por, kane ka kiew pyneh rngiew ka da itynnad bad I shngain shuh shuh wat ha ka liang jong ka niam ka rukom, khamtam haba ïadei bad ka shat ka kheiñ ka khnong ka bishar, ka nguh Blei Dem Blei, kaba kat ba ïapan ki Ryngkew ki Basa ki nongda ki nongker, ki nongsyrput syrpai ïa ka Seng Khasi Seiñ Raij bad ki khun ki ksiew u Hynñiew Skum u Hynñiewtrep, ka pynpaw ïa katta ka dap kyrhai hapdeng ka jingsuk bad ka biang ka bit nadong hadong.
Katba u Vice President Seng Khasi Kmie u Rgh D.L Nongbri, (ba juh khot ieit Bah Dip) u ïeng ban pynkynmaw ba mynta ka kynti ka dei ka kiew pyneh rngiew kaba kynjoh sha ki 26 tylli ki snem, kaba ïa tyngkhuh artad bad ka snem ka jingdap ba 125 snem jong ka jingseng ïa ka Seng Khasi Kmie.
Haba batai shaphang ki nongwan ïashim bynta, u bah Dip u sngew kmen shi katdei eh, ba ki paid nongwan ïashim bynta kam shim la shu kut noh tang na kane ka jylla, hynrei wat u paidbah na ki jylla ba marjan ne wat na shabar jong ka ri ruh ki la poi tiap ban ïa wan ban ïa kane ka sngi.
“Haba ngi shem bad ïohi ïa kat kane ka jingwan ïashim bynta u paid byllien, imat kan sa por ka por ba ngi kum ka Seng Khasi, ngin hap ruh wat ban shong pyrkhat thymmai pat”, ki long pat ki kyntien kaba u Bah Dip u pynpaw haba shem bad ïohi ïa ka jingnang bun ki nongwan ïashim bynta sha kne ka lehniam kaba shi sien shisnem.
“Lada ngin ïa shong pyrkhat sani bad haba saKhi ïa kane ka jingwan u paidbah kumne, kan pynpyrkhat biang ïa ngi ba imat kane ka Kiew Pyneh Rngiew lada kwah shisha ban pynryntih ïa kane ka kam, imat la donkam ban bteng noh baroh shi taiew, katta naduh ka sngi ba sdang ka Shi Hat Shi Taiew, ha kaba ka sngi kut kan long pat ha kum kane ka sngi” la pynpaw u bah Dip.
