Shillong, Rymphang, 06: Ha ka sien banyngkong eh ka jingpynpoi ïa ki marbam ha ka steshon Rel Mendipathar (MNDP) ha Meghalaya kaba hap hapoh ka Rangiya Division jong ka North East Frontier Railway (NFR) ka la lah ban pynpoi nyngkong eh ïa ki marbam ha ka 4 tarik mynta u bnai.
Kane ka kynthup ïa ki 21 tylli ki kali Rel kit marbam jong ka Food Corporation of India (FCI) ki la wan poi ha steshon Rel Mendipathar ha ka por 9:20 baje mynstep bad la pynhap ïa ki marbam ha ka por 9:40 baje mynstep. Kane kan long ruh ka sien kaba nyngkong eh ban pynhap mar na ki Rel kit mar ha ka jylla Meghalaya.
Naduh ba la pyntreikam ha ka 29 tarik Nailar, 2014, ka steshon Rel Mendipathar ka dei ka kaba nyngkong eh ha ka jylla Meghalaya. Kane ka dei ka sienjam kaba kongsan na ka bynta ka steshon rel ha ka thong ban kyntiew ïa ka ïoh ka kot jong ka thaiñ bad ban pynsuk ïa ka kit ka bah bad ka rah ka rong ïa ki mar ba kongsan ha ka thaiñ.
Ka rukom pynpoi ïa ki mar ka long kaba kongsan bha namarba ka pyntyllun ïa ki kam jong ka NFR. Ka kynhun baroh kawei jong ka NFR ka shimkhia ban pynjanai ïa ka jingpynpoi mar ha ka thaiñ lyngba ka teknoloji kaba kham bha, ka leit ka wan kaba stet bad ka jingkit ïa ki mar ha kylleng ka thaiñ.
Ka steshon Rel ha Mendipathar ka kular ban long kum ka jaka ba kongsan na ka bynta ka jingkit mar sha Meghalaya, ban noh synniang sha ka roi ka par jong ki jylla bad ban pynkhlaiñ ïa ka lynti Rel ha ka thaiñ Shatei Lammihngi.
