Shillong, Nailur, 02: Ka Sorkar Meghalaya kaba la bei pisa na ka bynta ki tamasa bapher bapher ka la ïoh lum pisa haduh T. 133.43 klur tang ha u snem 2024.
Ïa kane la pyntip da u Myntri ka tnat Jngohkai Pyrthei u Bah Paul Lyngdoh ha ka jingpynbna ïa ka Meghalaya’s Autumn Calendar 2025 kaba thmu ban kyntiew shuh shuh ïa ki kam jngohkai pyrthei ha ka Jylla.
“Ka jylla ka la bei pisa T.23.50 klur ha ki tamasa bapher bapher ha u snem ba la dep, kynthup ïa ka tamasa Me-gong, ka tamasa Cherry Blossom, bad ka tamasa Literary nalor kiwei kiwei. Ka jingmih na ka jingbei pisa ka long kaba heh bha haduh 133.42 klur tyngka,” u la ong ha ka jingïakren bad ki lad pathai khubor.
U Bah Paul u la pyntip ba a ka Shillong Cherry Blossom Festival, kaba la thmu ban pynlong ha ka 14 bad 15 tarik, Naiwieng mynta u snem ka kyntiew ïa ka jingïoh kamai ha u snem ba ladep ha kaba ka Sorkar Jylla ka la bei pisa T.5 klur bad ïoh jingmyntoi T.59.98 klur.
Katkum ka jingong jong u, ka mang tyngka na ka bynta mynta u snem ka long kumba T. 4 klur.
“Ha kane ka kynti, ïa ka tamasa Shillong Cherry Blossom yn pynlong ha Shillong ha madan JN Complex. Khnang ban pyni ïa ki nongjngohkai ha kane ka tamasa ïa ka jingsngew kaba kham pher kan don ka jingïaid kjat bad baroh kawei ka surok kaba leit sha madan Polo kan long kaba shu ïaid da ka kjat na ka bynta ka tamasa kaba ar sngi.”
Kumjuh ruh, ngin sa buh bun tylli ki dukan bad ki jingpyni ba laiphew jait tang shu rung sha Stadium, la ïathuh u Myntri.
Kane ka tamasa kan sa sakhi ruh ïa ka jingwan pynbyrngia da ki duhalia nabar ri bad na ka ri ha ka sngi sdang.
U Bah Paul u la pyntip ba u Jason Derulo bad ka kynhun rwai The Script kin sa pynlynguh ha ka sngi sdang, ryngkat bad ka nongshad bapawnam ka Nora Fatehi.
Ka Nora Fatehi, ka dei kaba la bna nam na ka bynta ka jingtbit jong ka, kynthup ha ka FIFA World Cup kaba la long ha Qatar ha u snem 2022, kan sa shad ha kane ka sngi, u la ong.
Kiwei pat ki tamasa ki kynthup ïa ka Meghalaya Kayak Festival ka ban sa long ha ka 14-18 tarik Risaw,, ka 7th Ahor 4×4 Offroad Challenge ha ka 23-25 tarik, Risaw, ka Shillong Literary Festival ha ka 20-22 tarik, Naiwieng, a Me-gng Festival ha ka 28-29 tarik Naiwieng bad ka Winter Tales ha ka 11-13 Nohprah.
Shuh shuh, u Myntri u la pynpaw ïa ka jingpyrshang jong ka Sorkar ban kyntiew ïa ki sap ki phong na ka jylla lyngba ki jingthmu kum ka prokram CMJMP kaba manla ka sngi, kaba la pyni ïa palat 7,000 ngut ki nongrwai.
“Bun ki kynhun tem bad ki nongrwai na la ka jong ka jylla kiba ju ïashim bynta shabar ka jylla mynta kin pyni ïa ka sap jong ki ha Meghalaya bad wat hakhmat ka pyrthei. Katto katne ki nongrwai kin sa ïashim bynta ha Singapore ha u bnai ban wan,” u la ong.
U Bah Paul u la pyntip ruh ba ka Sorkar ka la phaikhmat bha ban kyntiew ïa ki jingtei ha ki kam jngohkai pyrthei, kynthup ban pynïasoh ïa ki shnong lyngba ki Tourism Circuit.
Ka Tourism Policy Document ka batai ïa ki jingthmu ban kyntiew ïa ka tnad ha ka rukom kaba pura. Ka jingbei tyngka na ka bynta ban tei ïa ka 5-star ha Umïam bad Sohra la khmih lynti ba kan khring ïa ki nongjngohkai pyrthei bad kan kyntiew ruh ïa ka ïoh ka kot.
“Hapoh ki lai snem ban sa wan, ngi dei ban lah ban ïohi ba kine ki jingbei tyngka kiba heh ha ka Hospitality Sector khamtam eh ha ki hotel. Mynta ngin sa don sa ar tylli ki jaka 5 Star ha Umïam bad ar tylli ha Sohra. Nangta ngi don ïa ka Rain Museum ban sa shna ha Mawsynram, ka Mawmluh Experiential Cave ki ban ai jingtip ïa ki nongjngohkai pyrthei kiba wan sha Meghalaya,” u la ong.
Katkum ka jingong jong u, ka Sohra ka don palat 500 tylli ki Homestay bad bun ki longiing ha Sohra kiba la ïoh jingmyntoi na kine.
“Nga kwah ruh ban pynshai haba ngi pynlong ïa kine ki tamasa bun ki briew kiba ong ba ngi long kiba duk ngim lah ban siew hynrei kine ki dei ki jingbei tyngka lyngba ki nongjngohkai pyrthei kiba wan sha Meghalaya khnang ban kyntiew ïa ka ïoh ka kot jong ka jylla khnang ba ngin lah ban bei tyngka ha kito ki bynta kiba kongsan ha kaba mynta ngi duna,” la bynrap shuh shuh u Bah Paul.
