Shillong, Nohprah, 09: Ki Khasi kiba shong basah ha ka jylla Mizoram kiba don hapoh ka shatri jong ka Khasi Welfare Committee, Vairengte, Kolasib District ha ka sngi Baar ki la phah tuklar ha ka Sorkar Meghalaya halor ka jingbym ïoh ki Khasi kiba sah ha ka jylla Mizoram ïa ka Land Settlement Certificate (LCS).
Ha ka jingïakren bad ki lad pathai khubor hadien ka jingïakynduh ïa u Myntri Rangbah ka Meghalaya u Conrad K. Sangma, u General Secretary ka KSU u samla Donald V. Thaba u la ong ba ka buh jingeh ïa ki Khasi kiba sah ha Vairengte lada kim ïoh ïa ki kot ki sla.
U la ïathuh ba ka shem jingeh bha ïa ki Khasi ha Mizoram namarba ki dei ki ritpaid bad kaba ki donkam mynta ka dei ïa ka Land Settlement Certificate ban pynskhem ïa ka jinglong trai ïa ka jaka namarba ki kmie ki kpa tymmen ki la sah da ki spah snem sha ka jylla Mizoram bad im ruh da ka rep ka riang.
“Ka daw kaba ki Khasi ki la dawa ïa ka Land Settlement Certificate ka long namarba kim dei ki poiei sha ka jylla Mizoram hynrei ki la don naduh ki snem 1930. Ki la dei ki trai ri trai muluk. Ka KSU ka la ïakren bad u Myntri Rangbah ka Mizoram ban ai ïa ka Land Settlement Certificate sha ki Khasi namarba ki don la ki jong ki jaka bad ki bri kwai bad tympew. Ka Sorkar Mizoram ka la kular na ka por sha ka por hynrei kam shym la urlong satia. Dei na kata ka daw ba ki Khasi kiba sah ha Mizoram ki wan pan jingïarap na ka Sorkar Meghalaya namarba ka dei ka shnong trai jong ki,” la ong u samla Thabah.
U la ong ba u Conrad Sangma u la kular ba un sa ïakren bad u Myntri Rangbah ka Mizoram u Lalduhoma halor kane ka jingkyrpad jong ki Khasi kiba sah ha Mizoram.
Katkum ka jingïathuh jong u Secretary ka KSU Vairengte Unit u samla Paula Teibormiki Pajat, ki don kumba 500 tam ki nongshong shnong tang ha kawei kawei ka shnong ba la shong la sah da ki Khasi ha ka jylla Mizoram.
