Shillong, Nailur, 10: Ka Sorkar Jylla ka la bthah ïa u Chief Secretary ka Jylla u Bah DP Wahlang ba un khot ïa ka jingïalang kaba khatduh eh ïa ki nongïalam jong ka Harijan Panchayat Committee (HPC) ha kaba kut jong une u bnai Nailur bad ban phah ïa ka kaiphod halor ka jingshim rai ha kaba ïadei bad ka jingpynkynriah ïa ki 342 tylli ki longiing na Them Iew Mawlong.
Haba pyntip ïa kane ha ka sngi Baar, u Symbud Myntri Rangbah uba khmih ïa ka tnat Pynroi Sor Bah Sniawbhalang Dhar u la ong, “ngi la bthah ïa u Chief Secretary ban khot jingïalang ïa ki (HPC) bad ban phah ïa ka kaiphod kaba khatduh sha ngi bad ngin sa shim ïa ka rai na ka liang jong ka Sorkar Jylla.”
U Bah Dhar u la ong ba ka HPC ka la pan por da kaba pynpaw ba ki dang don sa katto katne ki mat ban ïakren bad ki bor bahalor jong ki.
“Namarkata, ka Sorkar ka la rai ban ai por. U Chief Secretary un sa khot ïa ka jingïalang ha ka taïew ba khatduh mynta u bnai bad un sa phah ïa ka kaiphod sha ka Sorkar ka ban sa shim ïa ka rai kaba khatduh,” u la bynrap.
Haba kylli, u Bah Dhar u la ong, “ngim ïohi satia ba kan don kano kano ka jingleh buit tuh (ban pynslem ïa ka kam) hynrei kum ka Sorkar ngi kwah ban poi sha ka pynkut kaba dei.”
U la ong ba ka Sorkar ka la shim ïa ka rai ba khatduh bad yn ym don shuh kano kano ka jingïakren halor kane ka kam hadien ba ladep khot jingïalang ka ban sa long ha ka taïew bakhatduh mynta u bnai.
