Shillong, Naitung, 30: Khyndiat sngi hadien ba ki Sengbhalang bapher bapher ka jylla ki la shim ïa ka rai ban pyntreikam hi noh ïa ka Meghalaya Residents Safety and Security Act (MRSSA) ka Khasi Students Union, Mawprem Circle bad Nongthymai Circle ha ka wat kaba ar ha ka sngi Baar ki la bteng ban kyndang naphang ïa ki nongbylla bar jylla ha ka thaiñ Mawprem bad ha ka thaiñ Nongthymmai ka KSU ka la kyndang ïa ki nongbylla bar jylla ha ka shnong Law-usib, Lapalang, Rynjah bad ka shnong Nongrim.
Ïa ki video ba la ring hi da ka seng bad ba la phah sha ki lad pathai khubor, u Vice President jong ka KSU Mawprem Circle u samla Pynshain Lyngdoh Lyngkhoi u la pyntip ba ka seng ka la lap sa kumba 17 ngut ki nongbylla bar jylla ki bym don ïa ka Work Permit ba la ai lyngba ka aiñ “The Inter-State Migrant Workmen (Regulation of Employment and Conditions of Service) Act, 1979” bad katkum ki Rules kiba la shna hapoh kane ka aiñ.
Ka seng ka la kyrpad ïa ki Kontrator ba kin ai kam shwa ïa ki paradoh para snam kiba dei ki trai muluk ki trai jaka bad maham ruh ba kim dei shuh ban wan ïalam da ki nongtrei bar jylla khlem da pynbiang shwa ïa ka ‘Work Permit. Ka Seng ka la kren ruh da kaba shai bad da leilei kan ym aili bad aijem ïa kino-kino ki malik kiba wanrah nongtrei bar jylla khlem da lah ban pynbiang shwa ïa ka Work Permit hashwa bad ha ka por ba ki ïalam trei ïa ki, la ong u kyrwoh.
Ka Seng ka pynpaw ruh ïa ka jingsngew diaw bad ka jingsngew bynñiaw ban ïohsngew ba ka jingkren jong u Myntri Rangbah u Conrad K. Sangma ba watla ki la don ki aiñ ki ban teh lakam ïa ka jingwan rung kyrthep ki bar jylla ban wan trei hapoh ka jylla hynrei na ka liang jong u, u la kubur bad ong ba ka Sorkar kam ithuh ïa kata ka Work Permit, la bynrap u kyrwoh.
“Ka seng ka kren shai ruh sha ki bor Sorkar ba nangne shakhmat kan dang pynjur shuh-shuh ïa ka jingkynra nongtrei barjylla da kaba ïai ban ha ka nongrim jong ka Work Permit bad ka Seng kan ym ithuh ne pdiang ïa kiwei-kiwei pat ki kot ki sla ïa ki nongtrei bylla bar jylla kiba la ai ha ka nongrim jong kiwei pat ki aiñ khyllah ba la shu ai pyndep rukom,” la bynrap u kyrwoh.
Katba ha ka jingkhynra jong ka KSU Nongthymmai Circle, u Assistant Organising Secretary ka seng u samla Kyrmenlang Mawrie u la ïathuh ba ka seng ka la lap ba ki don haduh 70 ngut ki bar jylla ki bym don ïa ki kot ki sla kiba shong aiñ.
