Shillong, K’lyngkot, 28: Ha kawei ka jingjia kaba pynpar niangkhriat ïa ki longing longsem bad ïa ka imlang ka sahlang, kawei ka khynnah skul kaba la 16 snem ka rta kaba dang pule ïa ka Class-XI ha kawei ka skul pule ki kynthei ha nongbah Shillong ka la pynkut noh ïa la ka jong ka jingim ha u tyllai phasi ha ka kamra klas tang hadien ba ladep thoh ïa ka eksamin.
U Superintendent of Police ka East Khasi Hills District u Bah Vivek Syiem ha ka jingïakren bad u nongthoh khubor ha ka sngi Baar u la ïathuh ba ki Pulit ka Sadar Police Station kiba la ïoh jingtip halor kane ka jingjia ha ka 24 tarik mynta u bnai ha ka por kumba 6:30 baje janmiet marmar ki la leit ban pynlong ïa ka jingtohkit kaba bniah ha kaba ki la lap ruh ïa kawei ka Suicide Note ba kane ka khynnah skul ka la thoh shwa ba kan pynkut noh ïa la ka jong ka jingim ha u tyllai phasi.
U la ïathuh ba ki Pulit ki la register case halor kane ka jingjia bad ki dang ap ruh ïa ka kaiphod kaba bniah na ka jingleh post mortem khnang ban tip shuh shuh ïa ka daw.
Shuh shuh u SP u la pyntip ruh ba ki bahaïing hasem ki la pyntip sha ki Pulit ba kane ka khynnah skul ka dei kaba don ïa ka jingshitom ha ka bor pyrkhat pyrdaiñ bad ka don hapdeng ka jingsngewsih mynta la katto katne bnai.
