Shillong, K’lyngkot, 04: Ka Green Tech Foundation (GTF) ha ka sngi Balang ka la leit ban ïakynduh ïa u Chief Executive Member jong ka Khasi Hills Autonomous District Council (KHADC) u Bah Winston Tony Lyngdoh ban phah khanglad ha ka Council ha kaba ïadei bad ka jingthmu ban tei ïa ka Eco-tourism Infrastructure Project kaba kot T. 23 klur ha Nongkhyllem Wildlife Sanctuary, Ribhoi District.
Ha ka jingïakren bad ki lad pathai khubor u Chairman ka GTF u Bah H. Bansiewdor Nonglang u la ong ba ïa kane ka project la wanrah ha u snem 2025 ladep ban pynsangeh hynrei mynta u snem 2026 la ïoh jingtip ba ïa kane ka Eco Tourism Infrastructure Project la thmu ban wanrah biang ha Nongkhyllem Wildlife Sanctuary.
U la ïathuh ba ka Foundation ka la ïoh jingtip lyngba shithi ba kan sa don ka jingïalang ha ka 18 tarik Rymphang 2026 haba ïadei bad kane ka project ha Nongkhyllem. U la ïathuh ruh ba ym tang ka Green Tech Foundation kaba pyrshah ïa kane ka projek hynrei ki dorbar shnong ruh bun kiba pyrshah ban wanrah ïa kane ka project namarba kan pynjot ïa ki jingthaw kiba im hapoh kane ka khlaw ba la sumar kyrpang.
Shuh shuh u la ong ba ha rilum Khasi bad Jaiñtia ki don tang ar tylli ki khlaw ba kyrpang, kata, ka Narpuh Wildlife Sanctuary bad ka Nongkhyllem Wildlife Sanctuary bad ha Narpuh Wildlife Sanctuary la bun sa tang da ki karkhana dewbilat bad ki mrad kiba don hapoh kane ka khlaw kin sa duhjait. Ha kajuh ka por u la kynthoh ruh, da kane kajuh ka rukom la thmu ban wanrah sa ïa ki heh spah ban pynjot ïa ka Nongkhyllem Wildlife Sanctuary.
U la ïathuh ba u CEM ka KHADC u la ong ba un sa khot ïa u Secretary ka Council ban ïa pynbeit halor kane ka mat namarba ka mat kaba ïadei bad ka khyndew ka shyiap ka dei ka bynta jong ka KHADC.
