Shillong, Risaw, 28: Uwei u heprit uba la 14 snem ka rta na ka shnong Quinine uba la jah na la ïing naduh ka por 10 baje mynstep ka 27 tarik Risaw, 2025 la lap ha ka sngi kaba bud kata ha ka 28 tarik, Risaw, 2025 ba u la sdien ha u tyllai phasi ha kawei ka khlaw kaba don ha ka Shnong Umsaw Nongkharai, Ribhoi District.
Ka thymmei khubor ka ïathuh ba ïa ka met jong une u heprit la lap da uwei u khynnah katba u dang thmu ban leit pom siej sha kane ka khlaw.
Katkum ka khubor ba la ïohlum la ïathuh ba ki bahaïing ki la pyrshang ban leit wat ïa u hynrei kim shym la lap satia bad mynta ka sngi ki bahaïing ki la leit ujor sha ki Pulit ka Nongpoh Police Station.
La ïathuh shuh shuh ba ki paidbah ka shnong Quinine ki la wad ïa une u khynnah uba jah naduh hynnin ka miet hynrei la lap pynban ïa ka met jong u ha ka khlaw kaba dang hap hapoh u pud u sam jong ka Shnong Umsaw Nongkharai.
Ki Pulit kiba la ïoh jingtip halor kane ka jingjia ki la leit ban pynlong ïa ka jingtohkit ryngkat ka jingsakhi lang jong ki nongtrei ka Forensic Crime scene Unit.
Hadien ba ladep pynlong ïa ka jingtohkit ki Pulit ki la pynkit noh ïa ka met jong u heprit sha Civil Hospital Nongpoh ban leh ïa ka postmortem hynrei na ka liang jong ki bahaing hasem kiba la pynpaw ba kim don ka jingsuba sniew ïano ïano ruh kumta ki la kyntait ban leh ïa ka post mortem.
