Shillong, Nailar, 04: Ha kine ki ar snem ba la leit noh ki la don 10 ngut ki briew kiba la ïap ha ki jingjia aksiden kiba la jia ha surok ka riat Rngain, Pynursla Civil Sub-division, East Khasi Hills District.
Ar tylli ki jingjia, ki dei kiba la jia ha u snem 2023. Ha ka 14 tarik, Ïaiong 2023, ki la don ar ngut kiba la ïap ba kynthup ïa u Rangbah Shnong jong ka Wahlyngkhat u Bah Seiborlang Jaktung. Ka jingïap jong ki ka dei namarba ka jingtwa khyndew ha kaba ka khyndew bad ki maw heh ki la rong ïa ka kali jong u kaba dang ïaid ha surok. Ha kane ka jingjia, ka la shim por bun sngi ïa ka kynhun Search and Rescue Team (SRT) ban ïoh sei ïa ka met jong ki namarba ka dei ha ka riat kaba jylliew.
Kawei pat ka dei ka jingjia ha u bnai Nailar, 2023 bad ha kane ka por ki la don lai ngut ki briew kiba ïap na ka daw ka jinghap ka trok sha riat kaba don hajan ka Lad Mawkhap.
Mynta ka kynti ka la mih pat sa ka jingïap jong ki hynriew ngut ki mynsiem briew na ka daw ba ka kali kaba ki shong ka la hap sha riat Rngain ha ka miet Sngi U Blei.
Kiba la ïap ha kane ka jingjia, ki kynthup ïa ar ngut ki kynthei bad lai ngut ki shynrang, uwei u khunlung ba dang shisnem tam bad i khunlung iba dang pun ha kpoh ka kmie.
Ha kane ka por ba ka jingpyntrei ïa ka surok Shillong-Dawki ka dang ïaid shaid shaid, ki la don ruh bun tylli ki jingjia kiba buh jingma ïa ki paidbah nongleit nongwan bad ki la don ruh bun tylli ki kali kiba la julor na ka daw ka jingtyllun jong ki maw, na ka jingtwa khyndew, ka jingkhyllem ki dieng bad kiwei pat ki jingjia ha kaba ki briew ki shu lait thaw da ka said na ki jingjia ba sngewsih.
Ki bor synshar ka Pynursla Civil Sub-division ki la khang ïa ki kali ban ïaid lyngba na ka surok Shillong-Dawki naduh Laitlyngkot shaduh ka shnong Langkyrdem katba ka jingshna ïa ka surok ka dang ïaid shakhmat.
