Shillong, Rymphang, 12: Ki shipai Border Security Force (BSF) ka 172 Battalion kiba paraha ha khappud Meghalaya ha ka sngi Baar ki la ïohkem arngut ki mynder Bangladeshi, ba kynthup ïa kawei ka kynthei bad arngut ki nong India kiba ïalam lynti katba ki dang thmu ban jam beaiñ sha pud u sam ka ri India ha khappud ka East Jaiñtia Hills District.
Ki shipai BSF ki la ïoh kurup ruh ïa kawei ka kali Alto ba la pyndonkam.
Shi sngi shwa kane, ki shipai BSF ki la ïohkem lai ngut ki kynthei mynder Bangladeshi ha khappud. Ka jingïohkem ïa kineki lai ngut ki kynthei ka long hadien ba ki BSF jong ka 4th Battalion ki la pynlong ka jingap ktem ha khappud Indo-Bangladesh ha East Khasi Hills district.
