Shillong, Lber, 10: Ïa ka phlim “The Blood and the Border” kaba batai shaphang ka kolshor jong ka jaidbynriew Khasi ba la shna da u Bah Wanphrang K Diengdoh yn sa pyni ban bishar ha Portland Hall, nongbah London ha ka 14 tarik mynta u bnai.
Ïa kane la pyntip da u Myntri Rangbah ka Jylla Conrad K.Sangma haba jubab ïa ka jingïatai halor ka mang tyngka kaba kaba la long ha ka Lah Sngi u Blei.
“Kane ka dei kawei na ki lad ban pynpaw pyrthei bad ban ai jingkyrshan ïa ka Meghalayan Age Limited bad ka tnat Tourism bad ym tang ïa u Bah Wanphrang hynrei ki dang don bun ngut ki nongshna phlim, ïa kiba ngi la ai jingkyrshan pisa mynta khnang ba ngin dup lah ban pynpaw pyrthei ïa la ka histori, ki jingthoh bad ka kolshor bapher bapher.
“Kam dei tang ka jingïakren halor kata. Kine ki dei ki kam ba shisha ba ngi la pyni. Ka shimpor. Ka jingthoh ïa ka Script na ka bynta kane ka phlim ka shimpor 2-3 snem ban pynjanai. Ki don bun ngut ki nongshna phlim, ïa kiba ngi la ai jingkyrshan bad ka long ruh ka jingsngew sarong ïa ka jylla Meghalaya ban ïohi ba ka kolshor bad ka histori jong ki briew jong ngi yn sa pyni paidbah ha London,” la pynpaw u Sangma.
U Myntri Rangbah u la ong ruh ba ki don ki briew kiba kynthoh ïa ka Sorkar ba ka pynlong ïa ki Concert bad ka wanrah ïa ki duhalia na shabar. “Kine ki dei ki jingbei tyngka kiba donkam kiba ngi donkam ban leh. Kane ka dei kawei na ki lad kamai na ki concert ki treikam,” u la bynrap.
“Ngi donkam ïa u USP ne ïa u nongrwai kyrpang ban khring bad ba ka karkhana rwai kan nangroi. Tang namarba phim leit peit ïalade bad ong balei ngi hap ban siew ïa kane namarba ka dei ka bynta jong ka thong kaba kham heh hynrei lada dei tang ïa kane ka kam ba ngi leh haoid ka dur ba shisha bad ka jingtrei shitom kin ym urlong,” u la ong.
Hapoh ka Meghalaya Grassroot Music Programme (MGMP), u Myntri Rangbah u la ong ba ka Sorkar ka la siew palat T. 17.5 klur sha ki 3,617 ngut ki nongrwai ba la rwai ha ki 7,621 tylli ki rynsan ha kylleng ka jylla ha kine ki 3 snem ba la leit noh.
“Nga kwah ban pynthikna ïa ka Iing bad ïa ki bad bun na ki nongrwai kiba ngi la buh thong hakhmat kan kynjoh sha ka 43,800 hajar ngut ki samla. Ki 43,800 ngut ki samla ngi kwah ban ai jingkyrshan lada ka long ban pynkiew ar shah ne lai shah ka jingmang pisa. Nga sngew skhem ba kadei kaba pynmyntoi ban leh kumta,” u la ong.
Shuh shuh u Myntri Rangbah u la pyntip ba ka Sorkar ka la mang pisa palat T. 10 klur hapoh ka Hello Meghalaya da kaba ai jingkyrshann palat 450 ngut ki Content Creator kiba dei ki Khasi, Pnar bad Garo.
