Shillong, Nailur, 02: U Myntri ka tnad Social Welfare ka Sorkar Jylla u Bah Paul Lyngdoh ha ka sngi Baar u la kyrpad ïa ki Dorbar Shnong ban ïatreilang bad ka Sorkar na ka bynta ban ïakhun pyrshah ïa ki jingma jong u drok da kaba thaw ïa ki Village Defence Party ha la ki jong ki shnong.
Ha ka jingïakren bad ki lad pathai khubor, u Bah Paul u la ong ba ka Sorkar ka la pynthymmai bad pynkiew ruh ïa ka jingsiew bai rneng ïa ki dkhot jong ki VDP na ka T. 800 sha ka T. 3,000 hajar shi snem.
Katkum ka jingong jong u, ki dkhot ka VDP kin ïarap lang ïa ka tnat Pulit ban ai jingtip, khlem da donkam satia ban don lang ha surok baroh arphew saw kynta.
U Myntri u la pynpaw ruh ka jingsngewkhia watla ka Sorkar ka la trei shitom, hynrei haduh mynta ki dang don tang 11 tylli ki kynhun VDP ha Shillong, ka nongbah kaba don ïa ka jingbun briew kaba palat 6 lak ngut.
“Nga la ïasam bad ki Dorbar Shnong ha ka jingïalang jong ka NEC ha Nongrim Hills ha kaba baroh ki Dorbar Shnong ba heh jong ka nongbah Shillong ki la wan ïashim bynta bad ngi la kyrpad ïa ki ban ïoh ïa ka skhim VDP kum ka VDP kaba dei ka kynhun ba la ithuh da ka aiñ bad kaba ai ruh ïa ki ïa ka jingïada katkum ka aiñ bad kaba treikam lang bad ki Pulit.”
“Nga kyrpad ïa ki Dorbar Shnong ban wan shakhmat ban shim kabu ïa ka jingtyrwa jong ka Sorkar Jylla namar kane kam dei hapdeng ka Sorkar pyrshah ïa ki paidbah, kane ka dei kam ki paidbah ryngkat bad ngi ban ïakhun pyrshah ïa ka jingma jong u drok,” la bynrap u Bah Paul Lyngdoh.
Shuh shuh, u Myntri u la pyntip ba ki don 6 ngut ki nongkhaïi drok kiba dang ïai bteng ïa ka kam khaïi kiba la ngat hapoh ka aiñ PITNDPS na ka bynta shisnem, kaba lah ban pynjlan lada lap ba ki leh biang ïa ki kam runar.
Ka Sorkar ka la ai jingïarap pisa sha ki Volunteer bad ïa ka ANTF, da kaba ithuh ïa ka jingtrei shitom jong ki ha kaba ïakhun pyrshah ïa ka jingkhaïi drok.
“Dang shen, nga la leit jngoh ïa ka ophis jong ka ANTF bad ngi la ai ruh ïa ka jingkyrshan pisa sha ki dkhot T. 10000 na ka bynta uwei uwei u Volunteer ka bym pat ju jia koit ha ki por ba la leit noh. Kine ki dei ki jingthmu kiba kongsan,” u la ong.
“Kumba phi lah ban ïohi ka ANTF mynta ka dei ka kynhun Pulit kaba aiti lut ba la ïalam da u SP ryngkat bad la ki jong ki kali bad ki briew kiba la shah hikai pyntbit. Ki jaka ki bym shym la shah ktah ha ki por ba la leit noh kum ka nuksa ka jaka Cantonment, Iewduh ki ANTF ki don hangta la jan man ka sngi.
Ha kaba ïadei bad ka jingkem bad shoh jong ki dkhot na kynhun bapher bapher ïa ki nongdih drok ba la jia ha kine ki sngi, u Bah Paul u la ong, “lada mano mano kiba leit kem bad ktah kti ruh ïa kiba suba nongkhaïi drok ka long kaba beaiñ bad ka buh jingma ruh ïa ka jingim jong u briew khamtam leilei lada dung u thyrnia injekshon bad kiwei kiwei ki jait tiar ba don ha ka met.”
