Shillong, Rymphang, 24: San ngut ki snar nongtuh thuk thuk ar shaka ki la ngat ei ha ka shrip jong ki Pulit ka Sohra Police Station bad ki Pulit ka Special Cell ka East Khasi Hills District.
Ha u kyrwoh ba la phah sha ki lad pathai khubor da u Superintendent of Police u Bah Vivek Syiem ha ka 24 tarik, Rymphang, 2025 u la pyntip hadien ba ka jingiakthong ia kawei ka kynhun Gang kaba donkti ban tuh ia ki thuk thuk ar shaka ha ka taiew baladep, da ka jingpynap shrip jong ki Pulit ka Sohra Police Station bad ki Pulit jong ka Special Cell ka East Khasi Hills, arngut ki snar nongtuh thuk thuk ba kynthup ia u Babu Marak uba la 19 snem ka rta na Dalia, Shella bad u Sunday N. Sangma uba la 30 snemk ka rta na Samanda, East Garo Hills ki la shah kem ha ka miet 23 tarik, Rymphang, 2025 ha Sohra Rim katba ki dang niah da ka kwei ka Suzuki Gixer Bike kaba don ia u nombar ML05 AD 4393, kaba la shah tuh na ka shnong Smit ia kaba ki la thmu ban leit die tuh sha ka ri Bangladesh.
Kine ki arngut ki la shimti ia kane ka thuk thuk na Mawkdok na kawei ka kynhun kaba donkti ban rong tuh ia ki thuk thuk kaba la jia kylleng ka nongbah Shillong.
Shuh shuh u SP u la iathuh, ha ka jingbuddien ia kine ki kam runar, lai ngut ki briew kiba ju donkti ban tuh ia ki thuk thuk ki la shah kem ha 7 Mer, East Khasi Hills bad kawei ka Scooty. Kine ki lai ngut ki snar nongtuh thuk thuk ki dei kiba la tip kyrteng kum u Barabor Namsaw uba la 28 snem ka rta na Jirang, Patharkhmah, u Banroilang Iawrod uba la 19 snem ka rta na Kynbahmalai, Phlangwambroi, Mawsynram bad u Declin Warjri uba la 20 snem ka rta na Nongmensong Shillon..
Katba ki Pulit ki dang pynlong ia ka jingtalasi kali ha Sohra, ki la ioh kurup ia kawei ka thuk thuk R15 ML05AA 3297 ba la shah tuh ha ka step 23 tarik, Rymphang, 2025 na Mawiong Umjapung.
Ia kine ki nongtuh thuk thuk la tian bishar ha Kashari hadien ba la pynngat hapoh ka Madanrting PS Case No 31(02)25 hapoh ka Section 303(2) jong ka BNS.
