Shillong, Nailur, 10: Ka seng ki nonghikai skul Lower Primary ba la tip kum ka All Primary School Teachers Association (APSTA) kan rakhe ïa ka lyngkhuh sngi ïap kaba 175 snem jong u Rev. Thomas Jones , ba la tip bad pynsah nam kum u Kpa ki Alphabet Khasi.
Ha kane ka jingrakhe yn kynthup lang ruh ïa ka jingdap 182 snem ka jingsdang ïa ki skul Lower Primary ha rilum Khasi bad Jaiñtia. Ki skul Lower Primary ba nyngkong eh ki long ha Mawsmai, Sohra Twa bad Mawmluh.
Ka APSTA ha u kyrwoh ba la phah da u General Secretary u Bah F. C Shullai u la ïathuh ba ka jingrakhe kan long ha ka 16 tarik mynta u bnai ha ka por 11.00 baje mynstep ha Thomas Jones School of Mission,Saitsohpen,Sohra.
Kum ka dak ban pynsah jingkynmaw ïa kane ka sngi ka APSTA kan noh synñiang sha ka Wisdom Centre Umdihar, Ri Bhoi District T. .25,000 hajar, sha ka Sanjo Mount Mercy Home Sister’s of Destitutes, Sohra T. 50,000 hajar, sha ka Borsing Children’s Home Mawsmai T.50,000 hajar bad sha ka Thomas Jones School of Mission T.50,000 hajar.
U Ko ngsan kyrpang ha kane ka sngi un long u MLA jong ka Shella Constituency u Bah Balajied Kupar Synrem uba long ruh u Chairman jong ka Meghalaya State Law Commission bad u Symbud Kongsan un long u MLA jong ka Sohra Constituency u Bah Gavin Miguel Mylliem uba long ruh u Advisor jong ka tnat ka Koit ka Khiah ka Sorkar Jylla.
Ka seng ka khot sngewbha ïa ki nonghikai skul Lower Primary ban ïashim bynta lang ha kane ka sngi.
