Shillong, Nailur 15: Ka Khasi Students Union (KSU) East Jaiñtia Hills District Unit ha ka sngi palei ka la rai ban pynlong da ka jingiakhih paidbah da kaba thiah hapdeng surokbah National Highway -6 ha Khliehriat kaba dei ka Headquarter jong ka East Jaiñtia Hills District.
Ia kane ka jingiakhih yn pynlong ha ka 25 tarik mynta u bnai naduh ka por 10:00 baje mynstep haduh 4:00 baje janmiet.
U kyrwoh ba la phah da u Publicity Secretary, u samla Hamewanpynhun Ryngkhlem u la ong, “la shim ia kane ka rai hadien ba ka National Highway Authority of India (NHAI) kam shym la patiaw ne sngap ia ka jingdawa ka seng ha ka wat ba nyngkong jong ka jingiakhih ha khmat ka Toll Gate ha Lumshnong ha ka 8 tarik, Nailar, 2023.”
“Ka jingiakhih ha kato ka sngi kaba la wan ia shim bynta naduh ki Rangbah shnong jong ka thaiñ Elaka Narpuh lem bad ki paidbah ba bun. U Manager Technical jong ka NHAI u Biswa Jyoti Lahkar u la kular ban pyndep ia ka jingmarmot ia ka surok hapoh hynriew taïew kaba mut un sdang naduh ka 09/08/2023, hynrei kata ka hynriew taïew ka la jan kut, hynrei ym don dak eiei.
Dang ha kine ki khyndait sngi ka seng ka la hiar shaduh Ratachera ban jurip, la lap pynban ba ka surok ka la nangjot rathai katba nangmih ki sngi. Kane ka long ka jingkular kai bad kular thok jong ka NHAI. Dei halor ka jingleh bymsuid ñiew ka NHAI kumjuh ka Sorkar ka la pynlong ruh tang ka jaka iaid na surok ym don jaka shuh ia ki paidbah. Ym don ba nud shuh ban mih iaid kai sha surok. Por slap da ka ktieh, por rang da u pumpum. Sangsot shisha ia u paidbah, kat shaba leit ka jingsahkut kali, ki paidbah shisha ki la mad kthang,” la ong u kyrwoh.
Lyngba une u kyrwoh ka seng ka khot bad wer ia ki paidbah nongshong shnong jong ka East Jaiñtia Hills District baroh kawei bad ia kiwei kiwei ki paralok sengbhalang ban iasnohkti lang ha ka jingiakhih ba jaijai da kaba thiah hapdeng surokbah.
“Ka long shisha ka jinglehraiñ kaba khraw ia ka Sorkar Jylla ha khmat ki saw tylli ki jylla ka thaiñ shatei lammihngi kum ka Mizoram, Tripura, Manipur bad Assam, namar kane ka surok bah ka dei kaba pyniasoh bad kine ki jylla,” ong u kyrwoh.
