Shillong, Naiwieng 03: Tang hapoh khyndiat kynta ba ka Hynñiewtrep Achik National Movement (HANM) ka la pynlong da ka jingiakhih ha Jantar Mantar, New Delhi ban dawa ia ka Sorkar NDA ba ialam da ka BJP ban pynrung ia ka Ktien Khasi ha ka Khyrnit Baphra, ban mynjur ia ka Inner Line Permit bad ban weng ia ka jingeh jong ki paidbah kiba sah ha khappud ka jylla Meghalaya bad Assam, mar mar ka MP jong ka Tura ka Agatha Sangma ka la ialam ia ki MLA na rilum Garo kiba long ruh ki Myntri hapoh ka Sorkar Jylla ban leit iakynduh ia u Secretary ka Ministry of Home Affairs ban pynsngew halor ka jingdawa ban pynrung lang ia ka Ktien Garo ha ka Khyrnit Baphra jong ka Riti Synshar ka Ri India.
Ki MLA ka rilum Garo kiba la synran lang ia ka Agatha ki long u Lamphang ka Ïingdorbar Thawain ka jylla u Thomas Sangma, u Myntri ka tnad PHE u Marcuise N. Marak bad ki nongialam jong ka Achik Literature Society (ALS) Garo hapoh ka jingialam jong ka President ka Dr. Caroline Marak.
Kane ka jingleit her kyrkieh jong ka MP bad ki MLA ka rilum Garo ka long hadien ba ka Sorkar India ka la thaw ia ka Committee ka ban bishar bniah ia ki 38 tylli ki jait ktien hapoh ka ri India ba kynthup ruh ia ka Ktien Khasi lait noh ka Ktien Garo na ka bynta ban pynrung ha ka Khyrnit Baphra jong ka Riti Synshar ka ri India.
Katkum ka jingtip ba la iohlum la iathuh ba ka Ministry of Home Affairs ka la kular ban kynthup lang ia ka Ktien Garo ha ka thup ki jait Ktien ban ioh jingithuh.
“Ka la don ka jingdawa na ki paidbah ban kynthup noh ia ka Ktien Garo ha ka Khyrnit Baphra bad ki Ophisar jong ka Ministry of Home Affairs ki la mynjur ban kynthup ia ka Ktien Garo ha ka thup ki jait ktien ban ioh jingmynjur,” la ong ka Agatha.
Ia ka ktien Garo la kren ha ki san tylli ki distrik jong ka rilum Garo ka Jylla Meghalaya bad kynthup ha ki katto katne ki bynta jong ka rilum Khasi bad Jaiñtia.
