Shillong, Naitung, 16: U Myntri ka tnat Jngohkai Pyrthei ka Sorkar Jylla ha ka sngi Saitjaiñ jong ka taiew ba ladep u la leit jngoh ïa ka Kupli Orchid Resort kaba don ha ka shnong Priang, West Jaiñtia Hills, kum shi bynta ka jingleit jurip ïa ka jaka jngohkai pyrthei ba la pynïaid da ka Sorkar.
Ïa u Bah Paul la synran lang da u MLA ka thaiñ u Bah Nujorki Sungoh ryngkat ka Director jong ka Tourism ka Kong Brenda L. Pakyntein bad kiwei kiwei ki ophisar.
Ha kane ka jingleit jngoh u Bah Paul u la shong da ka lieng ha Wah Kupli ban jurip ïa ki bynta jong kane ka jaka khnang ba ka sorkar kan dup lah ban kyntiew shuh shuh ïa ki kam jngohkai pyrthei ha kane ka thaiñ bad ïohlad ruh ban ïakren bad ki paidbah nongshong shnong ha kane ka thaiñ.
Hadien kane, u Bah Paul u la shong jingïalang ruh bad ki nongïalam na ka Synjuk Ki Waheh Shnong Iooski-Saphai Circle ha kaba ki la aiti ruh ïa ka dorkhas kaba kyntu ïa ka Sorkar Jylla ban phaikhmat lem na ka bynta ban kyntiew ïa ki jaka jngohkai pyrthei ha ki 13 tylli ki shnong ka thaiñ Chutwakhu–Saphai bad ki la kyntu ruh ïa ka Sorkar ba kan phaikhmat ruh ban kyntiew ïa ka roi ka par.
Ka Synjuk ka la tyrwa ruh ba ïa kine ki shnong dei ban pynbna noh kum ki shlem jngohkai pyrthei. Ki la kyntu ruh ïa ka Sorkar ban pruiddak bad ban kynthup ïa kine ki shnong hapoh u pud u sam jong ka tnat Jngohkai Pyrthei khnang ba ki nongshong shnong kin dup lah ban ïoh ïa ki skhim na ka sorkar, ka jingkyrshan pisa bad ki lad jinghikai pyntbit.
Ha ka dorkhas, ka Synjuk ka la tyrwa ruh ïa ka angnud ban pynkhuid ïa ka wah Kupli khnang ban kyntiew ïa ki kam jngohkai pyrthei bad ka jingsumar ïa ka mariang.
Nalor kata, ki la tyrwa ban wanrah ruh ïa ka Water Sports bad kiwei kiwei ki kam kiba ïadei bad ka jngohkai pyrthei kiba lah ban pynneh pynsah ïa ka jinglong jingman jong ka wah.
