Shillong, Naiwieng, 14: Ka Prof Sherwin M. Sungoh ha ka sngi Palei ka la kyntait mardor ban pdiang ïa ka jingshah thung kum ka Pro Vice-Chancellor jong ka NEHU Shillong Campus hadien ka jingkyrpad jong ki samla pule bad ki nonghikai ka skulbah NEHU.
Haba kren sha ki samla pule ha ka jingïalang ba lyngkot, ka Prof Sungoh ka la ong ba ïa ka jingpynbna (notification) ka la shu ïoh pdiang ha WhatsApp bad ïathuh ruh ba kan ym pdiang da leilei ruh em kum ïa kane ka rukom thungkam da u Vice chancellor.
“Ngan ym lah ban pdiang ïa kane ka jingthungkam ba la shu phah sha nga ha WhatsApp ba ïa kaba la soi da u soi da u Assistant Registrar (Planning) bad kaba khlem ïaid katkum ka lynti kaba ju dei ka rukom,” ong ka Prof Sungoh.
U Vice Chancellor ka NEHU u Prof. PS Shukla ha ka sngi Balang u la thung ïa ka Prof. Sherwin M. Sungoh na ka Department of Education ka skulbah NEHU kum ka Pro Vice Chancellor jong ka skulbah NEHU Shillong Campus bad ïa ka Prof. Fameline K. Marak na ka Department of Garo ha ka Tura Campus ba kin shimti ïa ka kam naduh ka 13 tarik, Naiwieng, 2024 katkum ka jingmynjur jong ka Executive Council.
Ka Prof. Sungoh ka la ong ruh ba kan pdiang beit tang ïa ka rai na ki kynhun kiba pynlong ïa ka jingïakhih hapoh ka skulbah NEHU.
