Shillong, Lber, 17: Hadien khatwei snem ba ka National Green Tribunal (NGT) ka la khang ïa ka jingtih bad shalan dewïong ha u snem 2014, ha ka Lah Sngi u Blei 2025 ka la long pat ka sngi kaba pynkmen ïa ki nongkhaii bad ïa ki nongbylla tih dewïong hadien ba u Myntri Rangbah ka Jylla u Conrad K. Sangma u la plie ïa ka par tih dewïong katkum ka juk stad saïan kaba nyngkong eh jong ka jylla ha East Jaiñtia Hills District bad kaba hap ban bud pyrkhing bha ïa ki kyndon ba la buh ban ïada ruh ïa ka mei mariang.
Ka par dewïong ba la plie paidbah ka dei ka par jong u Bah Dapmaiñ Shylla na ka shnong Byndihati East Jaiñtia Hills District, ‘‘Saryngkham-A’ ïa kaba yn tih ïa u dewïong katkum ka juk stad saïan.
U Conrad Sangma u la plie ïa kane ka par tih dewïong katkum ka juk stad saïan da kaba shu kren lyngba ka Video Conference.
Ka jingïoh plie ïa kane ka par tih dewïong katkum ka juk stad saïan ka long hadien ka jingïasoi ïa ki soskular hapdeng ka Sorkar Pdeng bad ki lai ngut ki nongtih par na ka jylla Meghalaya ha u Kyllalyngkot, 2025 kaba la plie lad ïa ka jylla Meghalaya ban pynim biang ïa ka jingtih dewïong katkum ki kyndon ba la buh.
Ka Sorkar Meghalaya, da ka jingïatreilang bad ka Controller of Coal, ka Sorkar India, bad ka Coal India Limited kum ka Third Party, ki la soi ruh ïa ki soskular na ka bynta ka jingtih dewïong ha West Khasi Hills bad ha East Jaintia Hills.
La pyntip ruh ba ki dang don shuh shuh sa 12 tylli ki aplikeshon ba la pan na ka bynta ban tih dewïong katkum ka juk stad saïan kiba dang ap ban ïoh jingmynjur.
Ha kane ka sngi, la sakhi lang da ka MLA jong ka Sutnga-Saipung Constituency Kong Santa Mary Shylla, u MLA jong ka Khliehriat Constituency Bah Kyrmen Shylla, u MLA barim Bah Justine Dkhar, u Executive Member jong ka Jaiñtia Hills Autonomous District Council Bah Hambertus Nongtdu, u Deputy Commissioner kaEast Jaiñtia Hills District u Shivansh Awasthi, u Superintendent of Police u Giri Prasad bad kiwei kiwei.
