Shillong, Naiwieng, 11: Ka jingshah thngan jong ki samla pule ka skulbah North Eastern Hill University (NEHU) ka la kynjoh mynta sha ka sngi kaba hynriew ban dawa hiar shuki ïa u Vice Chancellor u Prof. PS Shukla, ban dawa wengkam ïa u Registrar u Omkar Singh bad ïa u Deputy Registrar (Academics u Amit Gupta, weng lut ïa baroh ki nonghikai bad ki nongtrei ba la shu thungkam be-aiñ bad ban thung noh mardor ïa ki Pro Vice Chancellor ha Shillong bad ha Tura Campus.
Ka North Eastern Hill University Students Union (NEHUSU) ryngkat ka jingkyrshan lang jong ka KSU NEHU Unit ki la pynlong ïa ka jingshah thngan kaba khlem pud sngi naduh ka shiteng sngi jong ka 5tarik mynta u bnai.
Ha kine hynriew sngi, ar ngut ki samla pule kynthei bad lai ngut ki samla pule shynrang ki la kem tlot. Katba u samla Meban Kharmawlong uba dei ruh u Publicity Secretary jong ka KSU NEHU Unit u la kham shitom jur bad mynta u don hapdeng ka jingshah sumar ha NEIGRIHMS Hospital, Shillong.
Hadien ba ka jingshah thngan jong ki samla pule ka la kynjoh sha ka 149 kynta ha ka Lah Sngi u Blei, ka Vice President jong ka KSU NEHU Unit ka samla Cicilia Pyngrope kaba la kem tlot la shah pynkit noh sha Civil Hospital, Shillong ban ïoh jingsumar.
Ka samla Cicilia Pyngrope ka la rai ba ynda la kham khlaiñ kan sa bteng biang ïa ka jingshah thngan tad haduh u Vice Chancellor un da pynurlong ïa ka jingdawa jong ki samla pule.
Ki samla pule kiba la shah pynkit sha Civil Hospital hadien ba ki la ïoh jingkoit ki la wan phai ban bteng ïa ka jingshah thngan ha NEHU.
