Shillong, Risaw, 21: Ki nonghikai skul SSA kiba don hapoh ka shatri jong ka All Meghalaya SSA School Teachers Association (AMSSASTA) ki la pynbna ban pynsangeh shwa ïa ka jingïakhih kaba khlem pud sngi ha madan malki.
Ka AMSSASTA ka la shim ïa kane ka rai ban pynsangeh shwa ïa ka jingïakhih kaba khlem pud sngi hadien ka jingïakynduh ïa ka Myntri ka Sorkar Jylla ka Dr. Ampareen Lyngdoh bad ïa u Commisioner and Secretary ka tnat Pule Puthi ka Sorkar Jylla u Vijay Kumar Mantri ha ka Lah Sngi u Blei hadien ba la pynlong ïa ka jingïakhih kaba khlem pud sngi naduh ka 1 tarik mynta u bnai ban dawa ïa ka Sorkar Jylla ban kyntiew ïa ka tulop jong ki nonghikai skul SSA kiba don palat 13 hajar ngut ha ka jylla baroh kawei.
Ha ka jingïakren bad ki lad pathai khubor, u President jong ka AMSSASTA u Bah Peter Thyrniang u la ong, “hadien ba ngi la ïoh ïa ka jingkular na ka Myntri ka Sorkar Jylla ka Dr. Ampareen Lyngdoh bad na u Commisioner and Secretary ka tnat Pule Puthi u Vijay Kumar Mantri ba pynkiew ïa ka tulop kumba ngi la dawa. Hynrei na ka jingdon jong ka Model Code of Conduct (ha West Garo Hills District na ka jingdon jong ka elekshon shiteng samoi ha Gambegre Constituency) ka Sorkar Jylla kam lah ban pynbna bad kam lah ban pyntip lano kan ai bad katno kan ai.”
“Ngi sngewnguh ïa ka Sorkar kaba la sngap ïa ka jingdawa jong ngi. Kum ki nongïalam ka AMSSASTA ngi pyntip sha baroh ki nonghikai skul SSA ha ka jylla baroh kawei ba ïa ka jingïakhih kaba khlem pud sngi ngin pynsangeh noh naduh mynta ka janmiet tad haduh ba ka Sorkar kan da ai ïa ka jingdawa,” u la ong bad bynrap,”lada ka Sorkar kam pynurlong ïa ka jingdawa kumba ka la kular ngin sa wan phai biang sha madan ban dawa ïa ka hok haduh ba ngin da ïoh. Kumba ka Sorkar ka la kular, ngi kyrmen skhem ba ngin ïoh ïa u soh uba thiang.”
U la ïathuh ba ka Myntri ka la khlei ïa ka jubanlak ban buddien ïa ka jingkular bad ba ka Sorkar ka dei ban leh na ka bynta ka bha ka miat bad ka jingmyntoi jong ki nonghikai skul SSA.
“Ka la ong ruh ba lada ka Sorkar kam leh eiei, kan sa buddien bad ka la kyrpad ïa ngi ban wan ïakren manla ka por. U Commisioner and Secretary ka tnat Pule Puthi ruh u la phah wan ïakynduh ïa ngi ha ka taiew ban sa wan ban shong pyrkhat khnang ba ka jingdawa kan kham kloi,” la ïathuh u Bah Thyrniang.
“Namarba ki nongmihkhmat jong ka Sorkar ki la ai ka jingkular, ngin sa leit phai biang sha ki skul bad sha la iing bad ngin sa wan ban ïakynduh biang ïa ki Myntri ka Sorkar Jylla hadien ba la kut ka elekshon ha Gambegre Constituency,” ong shuh shuh u President ka AMSSASTA.
