Shillong, Naiwieng, 09: U MDC jong ka Mawlai Constituency u Bah Teiborlang Pathaw ryngkat lang bad ki nongialam shnong ha ka sngi palei ki la hiar jurip ia ki artylli ki surok iaid kali ba la siang rong, kawei kaba pyniasoh na ka shnong Mawlai Motsyiar sha Mawlai Umjaiur kaba jngai kumba 0.459 kilomitar bad kawei pat kaba pyniasoh ia ka Riat Medi sha Mawlai Nongpdeng kaba jngai kumba 0.120 km kiba la mang pisa lyngba ka tnat PWD.
Ha ka jingiakren bad ki lad pathai khubor u Bah Teibor u la iathuh ba ia ka surok na Riat Medi sha Mawlai Nongpdeng ladep shna sa tang ban plie paidbah noh. Katba ia ka surok kaba pyniasoh na Mawlai Motsyiar sha Mawlai Umjaiur u la ong ba na ka jingpynthut jong u slap bad ki contractor kin sdang noh ia ka kam namar kat haduh mynta ladep ban shna kumba 70 percent eiei ia ki Nala bad ia ki kynroh bad kaba sah mynta ka long sa tang ban siang ia ka rong.
U la ong ba ia kane ka surok la khmihlynti ban pyndep noh ha u Lber 2024 namarba kane ka dei ka surok kaba ki nongshong shnong ki la ap khmih lynti la kumba 40 snem eiei.
Kum ban shu pynkynmaw hangne ba ia u mawnongrim ban shna ia kine ki ar tylli ki surok la buh mawnongrim da u Symbud Myntri Rangbah ka Jylla Bah Prestone Tynsong ha ka 19 tarik, Nohprah, 2022.
