Shillong, K’lyngkot, 13: U Myntri Rangbah ka Jylla u Conrad ha ka Lah Sngi u Blei u la plie paidbah ïa ka “Captain Willïamson Sangma State University” ka skulbah kaba nyngkong eh, kata, hadien 50 snem ka jingïoh jylla bapura ka Meghalaya.
Ha ka jingplie ïa kane ka skulbah la sakhi lang da u Lamphang ka Iingdorbar Thawaiñ ka Jylla u Thomas A. Sangma, u Symbud Myntri Rangbah u Bah Sniawbhalang Dhar, u Myntri ka tnat Pule Puthi u Rakkam Sangma bad u Myntri ka tnat Bording u Abu Taher Mondal, ka Vice Chancellor jong ka University ka Prof. Vasanthi Vijayakumar bad kiwei kiwei ki heh ophisar jong ka tnat Pule Puthi bad kiwei kiwei.
Ïa ka jingtei jong kane ka skulbah la plie ha u bnai Kyllalyngkot, 2023 bad shwa kane, kata, ha u bnai Jylliew 2018, la ai jingmynjur ban tei ïa kane ka skulbah ha ka jinglut kaba kot 16 klur 96 lak tyngka bad ïa kane ka skulbah la ai nam ha ka kyrteng jong u Myntri Rangbah banyngkong eh jong ka Jylla u Captain Williamson A Sangma.
Ha u snem 2011, la sdang ïa kane ka skulbah da kaba ai kyrteng kum ka Captain Williamson Sangma State Technical University ban pynïasoh ïa baroh ki Technical College kiba don hapoh kane ka jylla bad ha u snem 2022, ka Sorkar ka la pynkylla biang ïa ka kyrteng jong ka skulbah sha ka Captain Williamson Sangma State University ban pynthikna ba baroh ki Technical bad ki Non-technical Colleges kin dup lah ban pynïasoh bad kane ka skulbah jong ka jylla.
Ha kane ka sngi ba la plie ïa kane ka skulbah, la sakhi ruh ïa ka jingpynïasoh jong ki College na rilum Garo kiba kynthup ïa ka Williamnagar College na Williamnagar, ka Captain Williamson Sangma College na Baghmara, ka Rongjeng Model College na Rongjeng, ka Ampati Degree College na Ampati, ka PA Sangma Abong Noga College na Tura, ka Mason Philips Academy na Tura, ka Mirriam Rural Women’s College bad ka Tura Christian College.
Kum ban shu pyntip hangne ba ka University Grants Commission ka la jingithuh ban tei Captain Williamson Sangma State University katkum ka Section 2 (f) jong ka UGC Act 1956 lyngba ka shithi sorkar kaba 6 tarik, Nohprah, 2024.
